ءابيبا ابۋجاقىنوۆا — دزيۋدودان الەم چەمپيوناتىنىڭ كۇمىس جۇلدەگەرى!

ءابيبا ابۋجاقىنوۆا 48 كەلى سالماقتا دزيۋدودان الەم چەمپيوناتىنىڭ كۇمىس جۇلدەگەرى اتاندى، دەپ حابارلادى تۋريزم جانە سپورت مينيسترلىگى.

ماجارستاننىڭ استاناسى — بۋداپەشت قالاسىندا ءوتىپ جاتقان الەم چەمپيوناتىنىڭ فينالىندا وتانداسىمىز يتاليا سپورتشىسى اسسۋنتا سكۋتتوعا ەسە جىبەردى. وسىلايشا ءابيبا ابۋجاقىنوۆا فينالعا دەيىن جەتىپ، وتاندىق دزيۋدو تاريحىندا الەم چەمپيوناتىندا كۇمىس مەدال جەڭىپ العان تۇڭعىش قازاق قىزى اتاندى.

سپورتشىلار 2023 جىلعى الەم چەمپيوناتىندا قولا جۇلدە ءۇشىن تالاسىپ، جەڭىس يتاليالىق سپورتشىعا بۇيىرعان ەدى، — دەلىنگەن حابارلامادا.

ەستەرىڭىزگە سالا كەتەيىك، ءابيبا ابۋجاقىنوۆا بۇعان دەيىن 3 جىل قاتارىنان الەمدىك دودادا جارتىلاي فينالعا شىعىپ، ەكى مارتە قولا جۇلدەگەر (2022، 2024) اتانعان بولاتىن.

تۋريزم جانە سپورت ءمينيسترى ەربول مىرزابوسىنوۆ دزيۋدودان بۋداپەشتە ءوتىپ جاتقان الەم چەمپيوناتىنىڭ ماراپاتتاۋ راسىمىنە قاتىستى.

مينيستر ايەلدەر اراسىندا 48 كەلى سالماقتا جۇلدەگە يە بولعان سپورتشىلاردى ماراپاتتادى.