جىل بويى جەتكەن جەتىستىكتەر

«ءبىلىپ الىپ ساياڭنان»، دەمەكشى جىل بويى ءبىلىپ الا ءجۇرىپ، جاتتىعۋىن تاستاماي  بيىكتەرگە جەتكەن جاسوسپىرىمدەر جازعى دەمالىسقا كوڭىلدى كۇيمەن شىقتى.

ك.احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  وقۋشىلارى مەن ستۋدەنت جاستارى بيىلعى وقۋ جىلىن اياقتاپ، جازعى دەمالىستارىنا  اتتاندى.

«وقۋ ينەمەن قۇدىق قازعانداي»، دەمەكشى جىل بويى مەكتەپ قابىرعاسىندا ءبىلىمىن شىڭداعان وقۋشىلار ءۇشىن دەمالىس قاجەت-اق. مىنە، كوپتەن كۇتكەن دەمالىس ايلارى دا كەلىپ جەتتى. قازاقستاندا دارىندى جاسوپىرىمدەردىڭ قاناتىن قاتايتىپ، ۇلتتىق قۇرامانىڭ جەيدەسىن كيىپ، الەم جارىستارىندا ەل نامىسىن ابىرويمەن قورعايتىن ۇل-قىزداردى تاربيەلەپ شىعارىپ جاتقان ك.احمەتوۆ اتىنداعى ءبىلىم مەن سپورتتى ۇشتاستىرعان شاڭىراق تاريحى دا تەرەڭنەن باستاۋ العان.

بۇل ءبىلىم شاڭىراعى سوناۋ 1989 جىلى №2 وليمپيادالىق رەزەرۆ ۋچيليششەسى بولىپ اشىلسا، 1994 جىلى وليمپيادالىق رەزەرۆ ۋچيليششەسىنە كاركەن احمەتوۆ اتى بەرىلەدى.

1998 جىلدان باستاپ ك. احمەتوۆ اتىنداعى سپورتتاعى دارىندى بالالارعا ارنالعان رەسپۋبليكالىق مامانداندىرىلعان مەكتەپ-ينتەرنات-كوللەدجى بولادى. 2012 جىلى رسمي نەگىزىندە وليمپيادالىق رەزەرۆ كوللەدجى بولىپ اشىلىپ، قازىرگى ۋاقىتتا «كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى» اتالىنادى. مىنە، وسى ارالىقتا تالانتتاردى تانىتقان  تاربيە ورداسىنان شىققان  اتى ايگىلى سپورتشىلاردىڭ قاتارى قالىڭ.  ايتالىق، ەلدوس سمەتوۆ وليمپيادانىڭ التىن جۇلدەسىن جەڭىپ السا،  اسحات جيتكەەۆ كۇمىس جۇلدەنى يەلەنگەنىن بىلەمىز. ال سول  اتتارى اتالعان قوس دارابوز بالۋانىمىز  كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  بولات قىران تۇلەكتەرى.  سونىمەن قاتار، بۇگىنگى تاڭدا ايتۋلى سپورت مەكتەبىنىڭ قابىرعاسىنان ءدارىس الىپ، دزيۋدو سپورتىندا الدىڭعى بۋىن ايگىلى اعالارىنىڭ جولىن ابىرويمەن جالعاستىرۋشى جاستار قاتارى ءوسىپ كەلەدى.

جازعى دەمالىسقا اتتانار الدىندا وقۋشىلار مەن ستۋدەنتتەردىڭ جىل بويى العان بىلىمدەرىنىڭ ناتيجەلەرى شىعىپ، كەيبىرى جاقسى جەتىستىكتەرىمەن قۋانىپ جاتسا، كەيبىرى وقۋ ۇلگەرىمىنىڭ تومەندىگىنەن  كوزدەرىندە  مۇڭ بار. دەگەنمەندە تاريحى تەرەڭ كەتكەن  مەكتەپ-ينتەرنات كوللەدجدىڭ وقۋشىلارى  ەشقاشان جەرگە قاراتقان ەمەس. بيىل دا سولاي بولدى. ءبىلىم مەن سپورتتى قوسا الىپ جۇرگەن ءجاسوسپىرىم دارىندى بالالار حالىقارالىق، الەمدىك جارىستاردا ەل نامىسىن ابىرويمەن قورعاپ قانا قويماي، وزدەرى  ءبىلىم الىپ، سپورتپەن شىڭدالىپ  جاتقان ك.احمەتوۆ اتىنداعى قاركەن احمەتوۆ اتىنداعى وليپيادالىق رەزەرۆىنىڭ ارنايى رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ اتىن شىعارىپ كەلەدى. 2024 پەن 2025 جىلعى وقۋ جىلى بارىسىندا 82 وقۋشى اتتتەستات العان ەكەن. ونىڭ ىشىندە 42 ءبىلىم الۋشى «دەنەشىنىقتىرۋ جانە سپورت» ماماندىعى بويىنشا كوللەدجى اياقتاپ، سونىڭ ىشىندە جاتتاقتىرۋشى-وقىتۋشى بىلىكتىلىگىنە يە بولعان. ال جەكەلەي توقتالا كەتسە، سپورتتىق رازريادتى ءۇش ادام السا، 82 ستۋدەنت قازاقستان رەسپۋبيكاسىنىڭ سپورت شەبەرىنە ۇمىتكەر بولعان. 26 شاكىرت قازاقستان رەسپۋبليكاسىنىڭ سپورت شەبەرى جانە 13 ساڭلاق حالىقارىلىق  دارەجەدەگى سپورت شەبەرى اتاعىنا تابان اقى ماڭدايتەرلەرىمەن قول جەتكىزگەن.

مىنە، وسىنداي تولعاي تابىستارمەن  جالىندى سپورتشىلار جىلدى قورىتىندىلاپ وتىر. سولاردىڭ اراسىندا حالىقارالىق، ازيا جانە الەم جارىستارىندا ەل قورجىنىنا جۇلدە سالعان بىرەگەي تالانتتاردى ەكشەلەپ اتاي كەتسە ارتىق بولماس ەدى. سولاردىڭ اراسىندا  اربىر سپورت تۇرلەرىنەن الەم چەمپيوناتى، الەم كۋبوگى، ازيا جارىستارى، حالىقارالىق جارىستار مەن قازاقستان بىرنشىلىكتەرىندە جۇلدە سالعان جەڭىمپازدار مەن جۇلدگەرلەردىڭ ەسىمدەرىن تىلگە تيەك ەتە كەتەيىك.

مىسالى، ايعانىم اسكارقىزى سايم، ارينا سەرگەەۆنا مياسنيكوۆا، ازات جاناباي ۇلى كۇمىسباەۆ، مۇحاممەدالي ماۋلەن ۇلى جىلقايدار، باتىرجان ەرجان ۇلى توقتار، ەراسىل سەگىزباي ۇلى ساتىنبەك، كيريلل دميتريەۆيچ پروحودوۆ، پولينا ۆيتالەۆنا كو، ەرحان بولات ۇلى قارامان، نۇرتاي  ناريقۇل ۇلى ناروۆ، الەكساندر يۆانوۆيچ رۋمىنسكي،  فەدور پەتروۆيچ ديدەنكو، انفيسا ۆلاديسلاۆوۆنا يۆانوۆا، دوسجان باعلان ۇلى ومىرسەرىك، كيريلل ستانيسلاۆوۆيچ ترەتياكوۆ، جانسەرىك مۇستافا ۇلى راحماتۋللين، ءامىرجان اسحات ۇلى ەربولات، ءاليحان تاليحان،  الدەر نۇركەن ۇلى ەرگەشوۆ ۇلگىلى وقۋلارىمەن بىرگە سپورتتىڭ  بارلىق تۇرلەرىنەن مەكتەپ-ينتەرنات كوللەدجدىڭ عانا ەمەس، ەلىمىزدىڭ ماقتانىشتارى بولىپ وتىر.

بيىلعى جىلى ءبىر وقۋشى «التىن بەلگىمەن» بىتىرسە، ەكى وقۋشىعا ۇزدىك اتتەستات بەرىلدى.  اتاپ كورسەتسەك، دانا ابدرايموۆا «التىن  بەلگى» ءتوس بەلگىسى  جانە «التىن بەلگى»  اتتەستاتى تابىس ەتىلدى. ماقپال قالمۇرزاەۆا مەن ماريا لەسوۆسكايا «ۇزدىك» اتتەستات الدى. ال 2024-2025 وقۋ جىلىندا كوللەدج تۇلەكتەرى 42 ستۋدەنت بولسا، ونىڭ ىشىندە 6 تۇلەك ۇزدىك ديپلومعا ۇمىتكەرلەر قاتارىندا تۇر.

مىنە، ك.احمەتوۆ اتىنداعى وررمميك دارىندى   وقۋشىلارى مەن ستۋدەنتتەرى 2025 جىلدىڭ جازعى  ءۇش اي دەمالىسىنا وسىنداي ۇلكەن جەتىستىكتەرمەن شىعىپ بارادى. «بۇلاق باسىنان تۇنيدى»، دەمەكشى، دارىندى جاسوسپىرىمدەردىڭ تولىققاندى ءبىلىم الىپ، شەبەرلىكتەرىن شىڭداپ تولاسسىز توگىپ جاتقان ەڭبەكتەرى ەسكەرىلىپ بارلىق جاعدايدى جاساپ بەرىپ وتىرعان مەكتەپ ۇجىمى مەن باسشىلىعىنا ايتار العىس ورىندى بولار. ويتكەنى، جاعداي جاسالاپ، قامقورلىق قولى بىلىنگەن جەردە تابىس تا كوپ كۇتتىرمەسى انىق. بۇل زاڭدىلىق اكسيوما. وقۋشىلاردىڭ اتتەستات الار قۋانىشتى ساتتەرى دە لايىقتى ۇيىمداستىرىلدى. ك.احمەتوۆ اتىنداعى وررمميك ديرەكتورى جايدار نۇراحمەت ۇلى  سايلاۋباەۆ پەن ونىڭ ورىنباسارلارى جاننا بايدۋللاقىزى مەن سالتاننات ورىنقىزى جىلدىڭ ۇزدىك اتانعان وقۋشىلارى مەن ستۋدەنتتەرىن قۇرمەتپەن ماراپتاتتاپ، قولدارىنا اتتەستاتتى تابىس ەتتى. ايتۋلى مەكتەپ ۇجىمى شاكىرتتەرىنىڭ جوعارى وقىپ بىتۋلەرىنە تولىقتاي ماقتانا الادى.  ك.احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  نەگىزگى مىندەتتەرىنىڭ ءبىرى – جاقسى سپورت رەزەرۆىن دايىنداۋ، ەلىمىزدىڭ ۇلتتىق قۇراما كوماندالارىنا ۇمىتكەرلەردى، سپورت سالاسىندا ورتا ارناۋلى ءبىلىمى بار مامانداردى دايارلاۋ.  «بولات قايناۋدا شىنىعادى، باتىر مايداندا شىنىعادى»، دەگەن ەكەن بابالارىمىز.

جاتتىعۋىندا شىنىعىپ، الەم جارىستارىندا ەلىمىزدىڭ نامىسىن قورعايتىن جاسۇلانداردى تاربيەلەپ جاتقان التىن دىڭگەڭتى  بەرەكەلى شاڭىراقتان تالانتتى  سپورتشىلاردىڭ كوپتەپ شىعاتىنىنا بەك سەنىمدىمىز.

 

اقىن ورداباي ۇلى،

الماتى