Taekvondoshy Sabrına Baıjigitova jastar arasynda álem chempıony atandy

Birikken Arab Ámirlikteriniń Ál-Aın qalasynda taekvondodan 15-17 jas aralyǵyndaǵy jastar arasynda GTF álem chempıonaty aıaqtaldy. Oǵan álemniń 25 elinen 600-den astam sportshy qatysty. Bul synda Qazaqstan quramasy sapynda óner kórsetken Sabrına Baıjigitova álem chempıony atandy, dep habarlady Astana qalasynyń ákimdigi.

Qazaqstan quramasy bul jarysta laıyqty óner kórsetti. Atap aıtqanda, Astana qalasynyń sportshysy Sabrına Baıjigitova 40 kg deıingi salmaq dárejesinde baq synady. Ol jaqsy daıyndyǵyn, sheberligin, tózimdiligin jáne jeńiske degen jigerin kórsete bildi.

Chempıondyq ataq úshin bolǵan tartysty jekpe-jekterde Sabrına Baıjigitova altyn medalǵa úmitti ózge elderdiń úzdik sportshylarymen kúsh synasty. Alaıda senimdilik pen naǵyz sportshyǵa tán minez kórsetken ol fınalda reseılik qarsylasynan aıqyn basym túsip, álem chempıonatynyń barlyq kezeńinen súrinbeı ótti, — delingen habarlamada.

Jalpykomandalyq esep boıynsha Qazaqstan quramasy álemniń úzdik úsh komandasynyń qataryna enip, taekvondonyń qazaqstandyq mektebiniń jaqsy deńgeıin taǵy bir márte dáleldedi.