تاريحي قولا جۇلدە

سەمسەرلەسۋدەن گرۋزيانىڭ تبيليسي قالاسىندا وتكەن الەم چەمپيوناتىندا قازاقستانننىڭ نامىسىن قورعاعان ءتورت ساڭلاعىمىز قولا جۇلدەنى جەڭىپ الىپ، الەمدى اۋزىنا قاراتتى. سىن الاڭىنا شىققان كيريلل پروحودوۆ، رۋسلان قۇربانوۆ، ۆاديم شارلايموۆ پەن ەلمير ءالىمجانوۆتار تورتتىگى ءۇشىنشى ورىن ءۇشىن باسەكەدە وسى سپورت تۇرىندە الدىنا جان سالماي الەمدىك  رەيتينگتە ءۇشىنشى ساتىدا كەلە جاتقان فرانتسيا قۇراماسىن  تاس-تالقان ەتىپ جەڭىپ، الەم چەمپيوناتىنىڭ قولا جۇلدەسىنە يە بولدى. بۇل سۇيىنشىلەپ جاريا ەتەر جاڭالىق ايتۋلى  سپورت تۇرىنەن  كوماندالىق سايىستا قازاقستان تاريحىنداعى العاشقى  سۇبەلى جەڭىس دەپ قۋانا ايتامىز.

بۇل ەكى ەلدىڭ اراسىنداعى تەكە-تىرەس 2023 جىلى وتكەن ەدى. سول كەسكىلەسكەن شايقاستا فرانتسيا سپورتشىلارىنىڭ باعى جانعان. ءبىزدىڭ سەمسەر ۇستاعان سەركەلەرلىمىز سول ءبىر كەتكەن ەسەنى قايتارىپ جەڭىستى ولجالاپ وتىر.

ەرلەر اراسىندا ساپى باعدارلاماسى بويىنشا وتكەن جەكپە-جەكتە ءبىزدىڭ جىگىتتەر فرانتسيانى 45:31 ەسەبىمەن جەڭىپ تىزە بۇكىتىردى. بۇل جەڭىس ەل تاريحىنداعى التىن ارىپپەن جازىلتىن ايتۋلى جەڭىس دەپ بىلەمىز. بۇعان دەيىن ميلاندا وتكەن الەم چەمپيوناتىندا جەكەلەي سىندا جەرلەسىمىز رۋسلان قۇربانوۆ قولا جۇلدەگە قول جەتكىزگەن بولاتىن.

قازاقستاننىڭ نامىسىن قورعاعان ەلىمىزدىڭ بۇل تورتتىگى جارىس جولىندا  رەسەيلىك بەيتاراپ كوماندانى 45:35 ەسەبىمەن جەڭگەن. كەلەسى كەزدەسۋلەرىندە  قىتاي قۇراماسىن 38:37 ەسەبىمەن جەڭىپ، شيرەك فينالدا قازىرگى الەم چەمپيوندارى يتاليامەن جولىعادى. تارتىسقا تولى وتكەن بۇل كەزدەسۋدە قازاقستاندىق سەمسەرشىلەر  الەم چەمپيونى دەگەن اتاعىنا قاراماي يتاليانى 45:43 ەسەبىمەن جەڭىپ، جارتىلاي فينالعا جولداما الادى.

جارتىلاي فينالدا جاپونياعا 41:42 ەسەبىمەن جول بەرىپ ءۇشىنشى ورىن ءۇشىن وتەتىن جەكپە-جەككە بار كۇشتەرىن سارقىپ سالۋعا شىعادى.  ال ءۇشىنشى ورىن ءۇشىن وتكىزگەن باسەكەدە ەل نامىسىن ابىرويمەن قورعاعان نوياندارىمىز ايدى اسپانعا شىعارىپ، وليمپيادانىڭ 1908، 1924، 1932، 1948، 1980، 1988، 2004، 2008 جانە 2016 جىلدارداعى چەمپيونى، وسى سپورت تۇرىندە الەم كوشىن باستاپ تۇرعان فرانتسيا قۇراماسىن  دارمەنسىز جاعدايعا قالدىرىپ جەڭىستى ج ۇلىپ الادى.

«ۇيادا نە كورسەڭ ۇشقاندا سونى ىلەسىڭ»، دەگەن ەكەن بابالارىمىز. وسىنداي عالامات جەڭىسكە جەتۋى وسكەن ورتاسى مەن دايىندالىپ شىققان جاتتىعۋ ورىندارىنىڭ ۇلەسى زور ەكەنىندە ايتقانىمىز دۇرىس بولار. وليمپيادا چەمپيونى ەلدوس سمەتوۆ، وليمپيادانىڭ كۇمىس جۇلدەگەرى اسحات جيتكەەۆ سىندى ساڭلاقتاردى تاربيەلەپ شىعارىپ وتىرعان الماتى قالاسىنداعى كاركەن احمەتوۆ اتىنداعى وليمپيادا رەزەرۆى رەسپۋبليكالىق مامانداندىرىلعان مەكتەپ-ينتەرنات-كوللەدجىنەن قانات قاعىپ ۇشىپ جاتقان ايگىلى سپورتشىلار از ەمەس. سونداي-اق، سەمسەرلاسۋ سپورتىنان بۇل مەكتەپ-ينتەرناتتان ءوسىپ ونگەن ەلمير ءالىمجانوۆ حالىقارلىق، الەمدىك جارىستاردا قانجىعاسى مايلانىپ، ەل نامىسىن ابىرويمەن قورعاپ كەلەدى.

سەمسەرلەسۋ سپورتىنان 2 دۇركىن وليمپيادا چەمپيونى، 3 دۇركىن وليمپيادا ويىندارىنىڭ كۇمىس جۇلدەگەرى 8 دۇركىن الەم چەمپيونى، 16 دۇركىن ەۋروپا چەمپيونى اتى اڭىزعا اينالعان ساڭلاق سپورتشى سوفيا ۆەليكايا دا ايتۋلى مەكتەپ-ينتەرناتتىڭ تۇلەگى.  وسى ءبىر ۇستاحانا ىسپەتتەس مەكتەپ-ينتەرناتتىڭ بۇگىنگى كۇنگى ماقتانشتارىمىز قوس بىردەي تۇلەگى  ەلمير ءالىمجانوۆ پەن كيريلل پروحودوۆتار وسى الەم چەمپيوناتىنان تاريحي ەل قورجىنىنا قولا جۇلدەنى سالىپ بەرىپ وتىرعان ساڭلاقتارىمىز. سوندىقتان دا بۇل جەر قازاق سپورتىنىڭ مايتالماندارىن تاربيەلەپ شىعارىپ وتىرعان قاسيەتتى قاراشاڭىراق دەسە بولعانداي.

سونىمەن بىرگە وسى تورتتىكتىڭ اراسىنداعى رۋسلان قۇربانوۆتىڭ شەبەرلىگىنە سۇيسىنە قول سوعا كەتكەن ورىندى بولار. بۇل سەمسەرشى الەم جارىستارىندا ەكى مارتە قولا جۇلدەنى جەڭىپ الىپ وتىر. ونىڭ ءبىرى جەكەلەي بولسا ەكىنشىسى كوماندالىق سىندا. ەلگە ورالعان سوڭ ءبىزدىڭ قازاقى داستۇرمەن شاشۋ شاشىپ قارسى الارىمىز بەلگىلى. سول قۇرمەت ماراپاتتاردىڭ اراسىندا  رۋسلانعا ەڭبەگى سىڭگەن سپورتشى شەبەرى  اتاعى بەرىلىپ جاتسا ارتىق بولماس ەدى. ءيا، ونى سپورت تىزگىنىن ۇستاعان مينيسترلىك قاپەرىندە ۇستايتىن شىعار دەگەن  سەنىم بار. ەندى وسى ەل نامىسىن الەم جارىسىندا ابىرويمەن قورعان كەلگەن ساڭلاقتارىمىز وسى قارقىنمەن الداعى وليمپيادا اسۋىن التىن جۇلدەمەن باعىندىرار دەگەن ءۇمىتتى ارقاۋ ەتەمىز.

اقىن ورداباي ۇلى،

الماتى