«قايرات» – «رەال مادريد» ماتچىنا بيلەتتەردى قايدان ساتىپ الۋعا بولادى؟

الماتىنىڭ «قايرات» كلۋبى 30 قىركۇيەكتە چەمپيوندار ليگاسىنىڭ توپتىق كەزەڭىندە ءمادريدتىڭ «رەال» كومانداسىمەن وينايدى. وسى تۋرالى قازاقپارات حابارلادى.

بۇل ماتچ الماتىنىڭ ورتالىق ستاديونىندا بولادى. ويىن استانا ۋاقىتىمەن 21:45-تە باستالادى.

بيلەتتەردى قايدان الۋعا بولادى؟

الدىڭعى ماتچتارعا بيلەتتەر كلۋبتىڭ رەسمي ارنالارى سانالاتىن Qairat SuperApp قوسىمشاسى، كلۋبتىڭ رەسمي سايتى (بيلەتتەر ءبولىمى) مەن Freedom SuperApp (بيلەتتەر ءبولىمى) جانە Ticketon پلاتفورماسىندا ساتىلعان بولاتىن. ءبىر قولعا بەس بيلەتتەن ارتىق بەرىلمەگەن. كلۋب ءباسپاسوز قىزمەتى جانكۇيەرلەرگە ساتىپ الۋ پروتسەسىن جەڭىلدەتۋ ءۇشىن الدىن الا تىركەلۋدى ۇسىنادى.

الايدا سۇرانىستىڭ كوپ بولۋىنا بايلانىستى بيلەتتەر تەز ساتىلىپ كەتەدى. بۇعان دەيىنگى ويىندارعا بيلەتتەر ەكى ساعاتتا ساتىلعان ەدى.

كەيىن الەۋمەتتىك جەلىلەردە ولاردى قايتا ساتۋشىلار 50-80 مىڭ تەڭگەگە دەيىنگى باعامەن ۇسىنعان.

وسىعان وراي جانكۇيەرلەر GosRating.com سايتىندا پەتيتسيا جاريالاپ، ءبىر ادامعا ەكى بيلەتتەن ارتىق ساتپاۋ جانە جسن ارقىلى تەكسەرىس ەنگىزۋ تۋرالى ۇسىنىس ءبىلدىردى.

قاشان ساتىلادى؟

رەسمي ساتۋ كۇنى ازىرگە جاريالانعان جوق. ادەتتە بيلەتتەر ماتچقا 1-2 اپتا قالعاندا ساتىلىمعا شىعادى. دەگەنمەن، بۇل جولى ساتىلىم ءۇش اپتا بۇرىن دا باستالۋى مۇمكىن.

اقپارات كلۋبتىڭ رەسمي ارنالارىندا جاريالانادى. جانكۇيەرلەرگە push-حابارلامالارعا سەنىپ قالماي، رەسمي ارنالاردى وزدەرى باقىلاپ وتىرۋ ۇسىنىلادى.

باعاسى نەشە تەڭگە بولادى؟

ىرىكتەۋ كەزەڭىندە بيلەتتەر 1500 تەڭگەدەن باستالعان بولاتىن. الايدا توپتىق كەزەڭدە، اسىرەسە «رەالعا» قارسى ماتچقا باعا ەداۋىر قىمبات بولۋى ىقتيمال. بۇل – ماتچتىڭ مارتەبەسىنە جانە وعان دەگەن سۇرانىسقا بايلانىستى.

قالاي ساتىپ الىنادى؟

ساتىلىم باستالعان ساتتە ۆيرتۋالدى كەزەك قۇرىلادى. ول كەزدەيسوق تارتىپپەن جۇرەدى. بوس ورىندار ساناۋلى مينۋت ىشىندە ءوتىپ كەتەتىندىكتەن، جانكۇيەرلەرگە جىلدام ارەكەت ەتۋ قاجەت.

تولەم ونلاين جاسالادى. بيلەتتەر ەلەكتروندى تۇردە بەرىلەدى.

«قايرات» العاش رەت ءوز تاريحىندا چەمپيوندار ليگاسىنىڭ توپتىق كەزەڭىنە شىقتى.

الماتى كلۋبى ىرىكتەۋ كەزەڭىندە سلوۆەنيانىڭ «وليمپياسىن»، فينليانديانىڭ «كۋپس» كلۋبىن، سلوۆاكيانىڭ «سلوۆانىن» جانە شوتلانديانىڭ «سەلتيگىن» جەڭدى.