Bokstan ÁCh: Qazaqstan altyn júldeni sanap alyp jatyr

Bokstan Ulybrıtanııanyń Lıverpýl qalasynda ótip jatqan álem chempıonatynda Qazaqstannyń erler jáne áıelder qurama komandalary altyn júlde úshin jan alysyp, jan berisken talasta aldyna jan salmaı keledi.

Búgin birinshi bolyp júldeni Nazym Qyzaıbaı jeńip aldy. Ol

48 kelige deıingi salmaqtyń fınaldyq jekpe-jeginde úndi Mınakshımen qolǵap túıistirdi.

Alǵashqy raýndta Mınakshı 4:1 esebimen basym tústi. Ekinshi raýnd 3:2 esebimen Nazym Qyzaıbaıdyń paıdasyna aıaqtaldy. Degenmen tóreshilerdiń sheshimi boıynsha úndis boksshy jeńiske jetti.

Osylaısha, Nazym Qyzaıbaı (48 kelige deıin) Qazaqstan quramasynyń qorjynyna alǵashqy júldeni saldy.

Odan keıin Sanjar Táshkenbaı altyn medal jeńip aldy

Bylǵary qolǵap sheberi 50 kelige deıingi salmaqtyń fınalynda Aldarqhıshıg Battýlgamen (Mońǵolııa) ózara myqtyny anyqtady.

Sanjar Táshkenbaı jekpe-jektiń birinshi raýndynan bastap tizgindi qolyna aldy. Tolyq úsh raýnd boıy basymdyǵyn saqtap qalǵan otandasymyz tóreshilerdiń sheshimimen jeńiske jetti.

Sóıtip, sportshy álem chempıonatynda Qazaqstan quramasynyń qorjynyna alǵashqy altyn medaldi saldy.

Sanjar Táshkenbaı osymen ekinshi márte álem chempıony atanyp otyr. Ol buǵan deıin 2023 jyly jeńis tuǵyrynyń birinshi satysyna kóterilgen bolatyn.

Bıyl ulttyq qurama sapynda aǵaıyndy Mahmud pen Tórehan Sabyrhandar álem chempıony atandy.

Mahmud Sabyrhan 55 kelige deıingi salmaqta úzdik boldy. Ol fınalda Rafael Losano Serranomen (Ispanııa) altyn júldeni sarapqa saldy.

Otandasymyz úsh raýnd boıy basymdyq tanytty. Nátıjesinde Mahmud Sabyrhan esh qıyndyqsyz jeńiske jetti. Sodan keıin Alýa Balqybekova bokstan álem chempıonatynda top jardy.

Alýa 51 kelige deıingi salmaqta qarsylas shaq keltirmedi.

Otandasymyz fınalda túrkııalyq Býse Naz Chakyroglýmen qolǵap túıistirdi. Tartysty jekpe-jektiń qorytyndysy boıynsha Alýa Balqybekova eki dúrkin álem chempıony atandy. Qorytyndy esep — 5:0. Al Aıda Ábikeeva bokstan eki dúrkin álem chempıony ataǵyn jeńip aldy.

Burymdy boksshymyz 65 kelige deıingi salmaqtyń fınaldyq jekpe-jeginde ózbekstandyq Navbahor Hamıdovany jeńdi.

Alǵashqy eki raýnd ózbek qyzynyń paıdasyna aıaqtaldy. Degenmen Aıda úshinshi raýndta boks úlgisin kórsetip, jeńisti sýyryp aldy. Nátıjesinde eki dúrkin álem chempıony atandy.

Sodan keıin kezek Tórehan Sabyrhanǵa keldi. Ol da aǵasy Mahmud sııaqty sharshy alańda atoı salyp, alǵash ret chempıon boldy.

Tórehan 70 kelige deıingi salmaqta fınalda japon Sevon Okadzavamen qolǵap túıistirdi.

Jekpe-jek teń dárejede boldy. Degenmen qazaq boksshysy úshinshi raýndta qarsylasynan aılasyn asyryp, jeńisti sýyryp aldy.

Osylaısha, 19 jastaǵy Tórehan Sabyrhan alǵash ret eresekter arasyndaǵy álem chempıonatynda altyn medaldi ıelendi.

Bıylǵy dodada Natalıa Bogdanova da álem chempıony boldy. Ol 70 kelige deıingi salmaqta qarsylas shaq keltirmedi.

Otandasymyz fınalda Avstralııanyń ókili Lekeısha Pergolıtıdi esh qıyndyqsyz jeńdi.

Rústem JUMAN,

ASTANA

Mahmud Sabyrhan

Alýa Balqybekova

Aıda Ábikeeva

Tórehan Sabyrhan

Natalıa Bogdanova

Nazym Qyzaıbaı