شاردارادا تۇڭعىش رەت ءبىر اۋلەتتىڭ ءۇش ۇلى الەم چەمپيونى اتاندى

قازاق سپورتى ءۇشىن تاريحي وقيعا! بولگاريانىڭ البەنا قالاسىندا ارمرەستلينگتەن ءوتىپ جاتقان الەم چەمپيوناتىندا «شاردارا ارمسپورت» قۇراماسىنىڭ سپورتشىلارى، ءبىر اۋلەتتىڭ ءۇش ۇلى قاتارىنان الەم چەمپيونى اتاندى، دەپ حابارلادى شاردارا اۋدانى اكىمىنىڭ ءباسپاسوز قىزمەتى.

بۇل – اۋدان عانا ەمەس، تۇتاس ەلىمىز ءۇشىن زور ماقتانىش!

14 جاستاعى بەكنۇر يبراگيم جاس جەتكىنشەكتەر اراسىندا 45 كگ سالماق دارەجەسىندە الەم چەمپيونى اتانسا، 15 جاستاعى ازامات يبراگيم 50 كگ سالماقتا قۇرمەت تۇعىرىنىڭ ەڭ بيىك ساتىسىنا كوتەرىلدى. سونىمەن بىرگە 18 جاستاعى ادىلەت يبراگيم 65 كگ سالماقتا الەم چەمپيونى اتاعىن جەڭىپ الدى، — دەلىنگەن حابارلامادا.

وسىلايشا، شاردارا اۋدانى تاريحىندا تۇڭعىش رەت ءبىر اۋلەتتىڭ ءۇش بالاسى حالىقارالىق دەڭگەيدەگى ءبىر جارىستا قاتارىنان چەمپيون اتانىپ وتىر. بۇل جەتىستىك – وتباسى تاربيەسىنىڭ، قاجىرلى ەڭبەكتىڭ جانە «شاردارا ارمسپورت» مەكتەبىنىڭ جۇيەلى جۇمىسىنىڭ ناقتى جەمىسى.

شاردارا اۋدانىنىڭ اكىمدىگى جەرگىلىكتى تۇرعىنداردىڭ اتىنان الەم چەمپيوندارىن جانە ولاردىڭ جاتتىقتىرۋشىلارىن شىن جۇرەكتەن قۇتتىقتاي وتىرىپ، بولاشاقتا دا بيىك بەلەستەردى باعىندىرا بەرۋلەرىنە تىلەكتەستىك بىلدىرەدى.