912 medal – 8 aıdaǵy rekord: otandyq sportshylar tarıhı nátıjege jetti

Qazaqstan álemdik sport arenasyndaǵy bedelin nyǵaıtyp keledi. Bıylǵy jyldyń alǵashqy segiz aıynda otandyq sportshylar 912 medal jeńip aldy. Onyń ishinde 351-i – altyn, 270-i – kúmis, 291-i – qola. Bul týraly Týrızm jáne sport mınıstrligi habarlady.

Otandastarymyz mundaı jetistikke memlekettiń sportqa júıeli qoldaýynyń, jattyqtyrýshylar quramynyń orasan zor eńbeginiń, sport federaııalarynyń úılesimdi jumysynyń nátıjesinde qol jetkizip otyr. Buǵan qosa ulttyq quramaǵa sheteldik mamandardyń kelýi jáne jańa ádistemelerdiń engizilýi de mańyzdy ról atqardy.

Bıylǵy maýsymdaǵy negizgi tarıhı jeńister:

* Short-trek – qysqy Azııa oıyndaryndaǵy alǵashqy altyn;
* Frıstaıl-mogýl – álem chempıonatynyń qola medali;
* Frıstaıl-akrobatıka (sınhrondy sekirý) – qysqy Azııa oıyndaryndaǵy alǵashqy altyn;
* Semserlesý – álem chempıonatyndaǵy alǵashqy tarıhı medal;
* Kórkem gımnastıka – jasóspirimder arasyndaǵy álem chempıonatyndaǵy alǵashqy altyn;
* Dzıýdo – áıelder arasyndaǵy álem chempıonatyndaǵy tarıhı fınal jáne alǵashqy kúmis medal;
* Boks – World Boxing uıymy aıasyndaǵy alǵashqy álem chempıonatynda jalpykomandalyq esepte 1-oryn;
* Mánerlep syrǵanaý – 2025 jylǵy álem chempıonatyndaǵy kúmis medal;
* Para bıatlon – Álem kýbogynyń qorytyndysy boıynsha Hrýstal globýstyń ıegeri.

Otandastarymyz komandalyq sport túrlerinde de mańyzdy jetistikterge qol jetkizdi. Atap aıtar bolsaq, «Qaırat» fýtbol klýby alǵash ret óz tarıhynda Chempıondar lıgasynyń negizgi kezeńine ótti. Al fýtzaldan «Qaırat» komandasy ÝEFA Chempıondar lıgasynyń kúmis júldegeri atandy.

Segiz aıdaǵy jetistikter – otandyq sporttyń qarqyndy damyp kele jatqanynyń aıqyn kórinisi. Endi sportshylardy Mılan-2026 qysqy Olımpııa oıyndary aldynda jaýapty maýsym kútip tur. Bul jeńister Qazaqstannyń álemdik sporttaǵy bedelin odan ári arttyra túsedi.