باسقا سپورتشىلاردىڭ جەڭىلىسىنە ءبىز كىنالى ەمەسپىز — شايدوروۆتىڭ جاتتىقتىرۋشىسى (ۆيدەو)

سپورت ءجۋرناليسى اقىرىس سەيىتقازى جاس تالانت ميحايل شايدوروۆتىڭ مانەرلەپ سىرعاناۋدان وليمپيادا چەمپيونى اتانعان كەزدە ونىڭ جاتتىقتىرۋشىسى الەكسەي ۋرمانوۆقا ۆيدەوقوڭىراۋ سوعىپ، اڭگىمەلەسكەن ەكەن. ونى ارىپتەسىمىز بۇگىن Facebook-تەگى پاراقشاسىندا جازدى، دەپ حابارلادى SportPress.kz

-ميلان ۋاقىتى  تۇنگە جاقىنداپ، بىزدە ءتۇن ورتاسى بولعاندا شايدوروۆتى وليمپ شىڭىنا جەتەلەگەن باپكەر، داڭقتى سپورتشى، وليمپيادا  چەمپيونى الەكسەي ۋرمانوۆپەن ۆيدەوقوڭىراۋ ارقىلى تىلدەستىم. سپورت الەمىندەگى اڭىز ادامداردىڭ ءبىرى بولعاندىقتان، قوبالجىعانىم راس. بىراق ويىمداعى سۇراقتاردى قويا الدىم. قازىر ۆيدەونۇسقاسى YouTube ارناما شىعادى. سىزدەر ءۇشىن فب-دا قىسقا قايىرايىن دەپ شەشتىم، — دەدى ول.

ەندى وسى اڭگىمەنى ءبىز وقىرمان نازارىنا ۇسىنۋدى ءجون كورىپ وتىرمىز. ۆيدەوسۇحبات تومەندى جاريالانىپ وتىر.

— جەلىدە يليا مالينين قۇلاپ قالعان سوڭ عانا شايدوروۆ التىن مەدال الدى، جولى بولىپ كەتتى دەگەن پىكىرلەر كوپ. بۇعان نە ايتاسىز؟

— بىرىنشىدەن، شىن مىقتىلاردىڭ عانا جولى بولادى. ەكىنشىدەن، باسقالاردىڭ قالاي ونەر كورسەتكەنىنە، نە ىستەگەنىنە ءبىز جاۋاپتى ەمەسپىز. ولار مۇنى وزدەرى ىستەدى عوي. ميحايل شايدوروۆ ءابسوليۋتتى تۇردە،  شىنايى كۇرەستە 100، 200 ەمەس ميلليون پروتسەنت جەڭىسكە جەتتى.

— دەسە  دە، بۇل ماۋسىم سىزدەر ءۇشىن وڭاي باستالمادى. جاڭادان قويىلعان قىسقا باعدارلامادان باس تارتىپ، بىلتىرعى «ديۋنانى» قايتاردىڭىزدار…

— بىلەسىز بە، ماۋسىمنىڭ ەڭ باستى جارىسى  — وسى ميلان مەن كورتيناداعى وليمپيادا ويىندارى ەدى. ءبىز بۇل ويىندا جەڭىسكە جەتتىك. ءبىزدىڭ باستى ماقسات – وسى ويىندا ءساتتى ونەر كورسەتۋ ەدى. ال ماۋسىمنىڭ باستالار شاعى نە ءۇشىن كەرەك؟ وسىنداي قاتەلىكتەردى انىقتاۋ ءۇشىن كەرەك. قايسىسى جاقسى، قايسىسى جۇمىس ىستەيدى، نەنى قالدىرامىز دەگەن سۇراقتارعا جاۋاپ الامىز. Scate America تۋرنيرىنەن سوڭ ءبىز بىلتىرعى «ديۋنانى» قايتارامىز دەپ شەشتىك. سەبەبى، جاڭا باعدارلامانى دۇرىس سىرعاناي المايتىنىمىزدى تۇسىندىك. بۇل قالىپتى جاعداي. جالعىز شايدوروۆ ەمەس، كوپتەگەن فيگۋريستەر بۇرىنعى باعدارلاماعا ورالىپ جاتادى. بۇل  — شىعارماشىلىق، بۇل – ءومىر. بۇل شەشىمگە كەلگەنىمىز وتە دۇرىس بولدى.

— ناۋرىز ايىندا مانەرلەپ سىرعاناۋان الەم چەمپيوناتى وتەدى. سول سىننان ميشانى كورە الامىز با؟

— نەگىزى، مەن باپكەر رەتىندە بيىلعى الەم چەمپيوناتىنا قاتىسۋدى جوسپارلاپ وتىرمىن. الەم بىرىنشىلىگىنە بارعانىمىز دۇرىس دەپ ەسەپتەيمىن.

— وليمپياداعا دايىندىق كەزىندە قانداي دا ءبىر قيىندىق بولدى ما؟ مەملەكەت كومەك كورسەتتى مە؟

— كومەك جاعىنان بىزدە ەشقانداي پروبلەما بولعان جوق. ءبىزدىڭ سۇراعانىمىزدى مەملەكەت 100 ەمەس، 200 پايىزعا اسىرىپ ورىنداپ بەردى. قولداۋ جاعىنان قيىندىق تۋىنداعان جوق.

سۇحباتتىڭ تولىق نۇسقاسى اقىرىس سەيىتقازىنىڭ YouTube ارناسىندا جاريالاندى.