SportPress.kz Qazaqstan sport jańalyqtary
Sport jýrnalısi Aqyrys Seıitqazy jas talant Mıhaıl Shaıdorovtyń mánerlep syrǵanaýdan Olımpıada chempıony atanǵan kezde onyń jattyqtyrýshysy Alekseı Ýrmanovqa vıdeoqońyraý soǵyp, áńgimelesken eken. Ony áriptesimiz búgin Facebook-tegi paraqshasynda jazdy, dep habarlady SportPress.kz
-Mılan ýaqyty túnge jaqyndap, bizde tún ortasy bolǵanda Shaıdorovty Olımp shyńyna jetelegen bapker, dańqty sportshy, Olımpıada chempıony Alekseı Ýrmanovpen vıdeoqońyraý arqyly tildestim. Sport álemindegi ańyz adamdardyń biri bolǵandyqtan, qobaljyǵanym ras. Biraq oıymdaǵy suraqtardy qoıa aldym. Qazir vıdeonusqasy YouTube arnama shyǵady. Sizder úshin FB-da qysqa qaıyraıyn dep sheshtim, — dedi ol.
Endi osy áńgimeni biz oqyrman nazaryna usynýdy jón kórip otyrmyz. Vıdeosuhbat tómendi jarııalanyp otyr.
— Jelide Ilıa Malının qulap qalǵan soń ǵana Shaıdorov altyn medal aldy, joly bolyp ketti degen pikirler kóp. Buǵan ne aıtasyz?
— Birinshiden, shyn myqtylardyń ǵana joly bolady. Ekinshiden, basqalardyń qalaı óner kórsetkenine, ne istegenine biz jaýapty emespiz. Olar muny ózderi istedi ǵoı. Mıhaıl Shaıdorov absolıýtti túrde, shynaıy kúreste 100, 200 emes mıllıon proent jeńiske jetti.
— Dese de, bul maýsym sizder úshin ońaı bastalmady. Jańadan qoıylǵan qysqa baǵdarlamadan bas tartyp, byltyrǵy «Dıýnany» qaıtardyńyzdar…
— Bilesiz be, maýsymnyń eń basty jarysy — osy Mılan men Kortınadaǵy Olımpıada oıyndary edi. Biz bul oıynda jeńiske jettik. Bizdiń basty maqsat – osy oıynda sátti óner kórsetý edi. Al maýsymnyń bastalar shaǵy ne úshin kerek? Osyndaı qatelikterdi anyqtaý úshin kerek. Qaısysy jaqsy, qaısysy jumys isteıdi, neni qaldyramyz degen suraqtarǵa jaýap alamyz. Scate America týrnırinen soń biz byltyrǵy «Dıýnany» qaıtaramyz dep sheshtik. Sebebi, jańa baǵdarlamany durys syrǵanaı almaıtynymyzdy túsindik. Bul qalypty jaǵdaı. Jalǵyz Shaıdorov emes, kóptegen fıgýrıster burynǵy baǵdarlamaǵa oralyp jatady. Bul — shyǵarmashylyq, bul – ómir. Bul sheshimge kelgenimiz óte durys boldy.
— Naýryz aıynda mánerlep syrǵanaýan álem chempıonaty ótedi. Sol synnan Mıshany kóre alamyz ba?
— Negizi, men bapker retinde bıylǵy álem chempıonatyna qatysýdy josparlap otyrmyn. Álem birinshiligine barǵanymyz durys dep esepteımin.
— Olımpıadaǵa daıyndyq kezinde qandaı da bir qıyndyq boldy ma? Memleket kómek kórsetti me?
— Kómek jaǵynan bizde eshqandaı problema bolǵan joq. Bizdiń suraǵanymyzdy memleket 100 emes, 200 paıyzǵa asyryp oryndap berdi. Qoldaý jaǵynan qıyndyq týyndaǵan joq.
Suhbattyń tolyq nusqasy Aqyrys Seıitqazynyń YouTube arnasynda jarııalandy.
