SportPress.kz قازاقستان سپورت جاڭالىقتارى
گەرمانيانىڭ ينتسەلل قالاسىندا كونكيمەن جۇگىرۋدەن وتكەن جاسوسپىرىمدەر اراسىنداعى الەم چەمپيوناتىندا قازاقستان قۇراماسى التى التىن، ءبىر كۇمىس مەدال جەڭىپ الىپ، جالپى جەتى جۇلدەمەن جارىستى قورىتىندىلادى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.
الەم چەمپيوناتىنىڭ سوڭعى جارىس كۇنىندە التىنشى التىن مەدالدى قورجىنعا ۆاديم چەبارداكوۆ سالدى. ول ماسس-ستارت باسەكەسىندە قارسىلاستارىنا دەس بەرمەي، 5:29.87 ناتيجەمەن مارە سىزىعىن ءبىرىنشى بولىپ كەستى. وتانداسىمىز جارىستا 34 سپرينتەرلىك ۇپاي جيناپ، چەمپيون اتاندى.
كوماندا كوشباسشىلارىنىڭ ءبىرى كريستينا شۋمەكوۆا ءۇش بىردەي قاشىقتىقتا ياعني 500، 1000 جانە 1500 مەتردە التىن جۇلدە يەلەندى. سونداي-اق ول كىشى كوپسايىس قورىتىندىسى بويىنشا دا ۇزدىك دەپ تانىلدى. بۇعان قوسا، 3000 مەتردە كۇمىس مەدال جەڭىپ الىپ، جەكە كورسەتكىشىن تولىقتىردى.
ايەلدەر قۇراماسى كوماندالىق سپرينتتە دە بيىكتەن كورىندى. بۇل سايىستا ەل نامىسىن كريستينا شۋمەكوۆا، اناستاسيا بەلوۆودوۆا جانە ۆارۆارا گلۋحوۆا قورعاپ، قارسىلاستارىن ارتتا قالدىردى.
وسىلايشا، وتانداستارىمىز الەمدىك ارەنادا ءوز الەۋەتىن تاعى ءبىر مارتە دالەلدەپ، ەل مەرەيىن ۇستەم ەتتى.
