تارازدا كۇرەستەن قازاقستان چەمپيوناتى باستالدى

تاراز قالاسىنىڭ «تاراز-ارەنا» سپورت كەشەنىندە گرەك-ريم، ەركىن جانە ايەلدەر كۇرەسىنەن U15 جانە U23 جاس ساناتتارى اراسىنداعى قازاقستان چەمپيوناتىنىڭ سالتاناتتى اشىلۋ ءراسىمى ءوتتى، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

بيىلعى قازاقستان چەمپيوناتىنا ەلىمىزدىڭ تۇكپىر-تۇكپىرىنەن كەلگەن مىڭنان استام جاس بالۋان قاتىسۋدا. بۇل دودا جاسوسپىرىمدەر مەن جاستار ءۇشىن ۇلكەن سپورتقا باستار ماڭىزدى بەلەس سانالادى. سەبەبى، دال وسى جارىستا توپ جارعان بالۋاندار الداعى ۋاقىتتا ازيا جانە الەم چەمپيوناتتارىندا ەل نامىسىن قورعايتىن نەگىزگى ۇمىتكەرلەر قاتارىنا قوسىلادى.

جارىستىڭ رەسمي بولىمىندە جامبىل وبلىسىنىڭ اكىمى ەربول قاراشوكەەۆ قاتىسۋشىلاردى ەل چەمپيوناتىنىڭ باستالۋىمەن قۇتتىقتاپ، تاراز ءوڭىرىنىڭ سپورت تاريحىنداعى ورنى ەرەكشە ەكەنىن اتاپ ءوتتى.

– داڭقتى سپورتشى، وليمپيادا چەمپيونى جاقسىلىق ۇشكەمپىروۆ اعامىز باستاعان بۇل جامبىل ءوڭىرى كۇرەس شەبەرلەرىنە ءاردايىم باي ەكەنىن دالەلدەپ كەلەدى. جامبىل جەرىنەن شىققان تالاي ساڭلاق سپورتشىلار ەل سپورتىنىڭ تاريحىنا ءوز ەسىمدەرىن التىن ارىپتەرمەن جازىپ قالدىردى. ولاردىڭ جەڭىستى جولى بۇگىنگى جاس بۋىن ءۇشىن ۇلكەن ونەگە ءارى ماقتانىش. اتالعان جەتىستىكتەر وڭىردە سپورتتى جۇيەلى دامىتۋعا باعىتتالعان ەڭبەكتىڭ، جاتتىقتىرۋشىلار مەن سپورتشىلاردىڭ تاباندى ىزدەنىسىنىڭ ناتيجەسى. سىزدەرگە وسى جارىستا جوعارى ناتيجەلەر مەن ءادىل باسەكە تىلەيمىن، – دەدى ءوڭىر باسشىسى.

بۇدان كەيىن ءسوز العان قازاقستان كۇرەس فەدەراتسياسىنىڭ پرەزيدەنتى ەركىن وقاسوۆ جاس بالۋاندارعا ساتتىلىك تىلەپ، چەمپيوناتتىڭ ەلىمىزدەگى كۇرەس سپورتىن دامىتۋداعى ماڭىزىنا توقتالدى.

– ەل چەمپيوناتىنىڭ كيەلى تاراز تورىندە ءوتىپ جاتقانىنا شىنايى قۋانىشتىمىن. سەبەبى، بۇل ءوڭىر – تالاي الەم جانە وليمپيادا چەمپيوندارىن تاربيەلەگەن قاسيەتتى مەكەن. سوندىقتان، وسى بالۋانداردىڭ اراسىنان دا  ەلىمىزدىڭ نامىسىن ابىرويمەن قورعايتىن مىقتى چەمپيونداردىڭ ءوسىپ شىعاتىنىنا كامىل سەنىمدىمىن. بۇل چەمپيونات جاستار ءۇشىن ۇلكەن جارىستاردىڭ العاشقى باسپالداعى. ياعني بۇگىنگى جاسوسپىرىمدەر مەن جاستار ەرتەڭگى ازيا جانە الەم چەمپيوناتتارىنىڭ، سونداي-اق وليمپيادا ويىندارىنىڭ ۇمىتتەرى، – دەدى ەركىن قادىرعالي ۇلى.

ايتا كەتسەك، بيىلعى ەل چەمپيوناتىندا جاس بالۋاندارعا اقشالاي سىياقىلار قاراستىرىلعان. U15 جاس ساناتىندا چەمپيون 200 مىڭ تەڭگە، كۇمىس جۇلدەگەر 100 مىڭ تەڭگە، ال قولا جۇلدەگەرلەر 50 مىڭ تەڭگەدەن الادى. ال U23 ساناتىندا قازاقستان چەمپيونى 500 مىڭ تەڭگەگە، ەكىنشى ورىن يەگەرى 300 مىڭ تەڭگەگە، ال ءۇشىنشى ورىن العان بالۋاندار 150 مىڭ تەڭگەدەن سىياقىعا يە بولادى. سونىمەن قاتار، چەمپيوناتتا ارنايى نوميناتسيالار دا تاعايىندالعان. «قايسار رۋح» جانە «دارا ءتاسىل» اتالىمدارىنىڭ جەڭىمپازدارى 150 مىڭ تەڭگە كولەمىندە سىياقى الادى.

چەمپيوناتتىڭ العاشقى جارىس كۇندەرى گرەك-ريم كۇرەسىنىڭ U15 جاس ساناتىنداعى بالۋاندار بوزكىلەمگە شىقتى. تارتىستى وتكەن بەلدەسۋلەردىڭ ناتيجەسىندە بەرەكەت يسماگۋلوۆ (38 كگ، ماڭعىستاۋ وبل.)، رايىمبەك جاقسىلىق (41 كگ، سقو)، نۇرالى امانگەلدى (44 كگ، اباي وبل.)، روللان كيم (48 كگ، الماتى ق.)، دانيال قاناتباي (52 كگ، الماتى وبل.)، ايتۋعان وسمان (57 كگ، تۇركىستان وبل.)، سانجار تۋلەپوۆ (62 كگ، الماتى ق.)، رۋسلان باكىر (68 كگ، جامبىل وبل.)، نۇرتۋعان مۇرات (75 كگ، قاراعاندى وبل.)، ەرالي مۇراتوۆ (85 كگ، اباي وبل.) جانە نۇرمۇحاممەد تالعات (+85 كگ، اباي وبل.) قازاقستان چەمپيونى اتاندى.

ال بۇل جاس ساناتىنداعى جالپىكوماندالىق ەسەپتە قورجىنىندا 1 التىن، 2 كۇمىس جانە 4 قولا مەدالى بار تۇركىستان وبلىسى 155 ۇپايمەن كوش باستادى. ەكىنشى جانە ءۇشىنشى ورىنداردى جامبىل وبلىسى (1 التىن، 1 كۇمىس، 3 قولا) مەن اباي وبلىسى (3 التىن) يەلەندى. ولاردىڭ ەنشىسىندە تيىسىنشە 106 جانە 89 ۇپاي بار. ايتا كەتسەك، جالپىكوماندالىق ەسەپ United World Wrestling ەرەجەسى بويىنشا ءار سالماق دارەجەسىندەگى ۇپاي سانىمەن سانالادى.

P.S. گرەك-ريم، ەركىن جانە ايەلدەر كۇرەسىنەن U15 جانە U23 جاس ساناتتارى اراسىنداعى قازاقستان چەمپيوناتى 18 ناۋرىزدا ءوز مارەسىنە جەتەدى.