Tarazda kúresten Qazaqstan chempıonaty bastaldy

Taraz qalasynyń «Taraz-Arena» sport kesheninde grek-rım, erkin jáne áıelder kúresinen U15 jáne U23 jas sanattary arasyndaǵy Qazaqstan chempıonatynyń saltanatty ashylý rásimi ótti, dep habarlady Qazaqstan kúres federaııasynyń baspasóz qyzmeti.

Bıylǵy Qazaqstan chempıonatyna elimizdiń túkpir-túkpirinen kelgen myńnan astam jas balýan qatysýda. Bul doda jasóspirimder men jastar úshin úlken sportqa bastar mańyzdy beles sanalady. Sebebi, dál osy jarysta top jarǵan balýandar aldaǵy ýaqytta Azııa jáne Álem chempıonattarynda el namysyn qorǵaıtyn negizgi úmitkerler qataryna qosylady.

Jarystyń resmı bóliminde Jambyl oblysynyń ákimi Erbol Qarashókeev qatysýshylardy el chempıonatynyń bastalýymen quttyqtap, Taraz óńiriniń sport tarıhyndaǵy orny erekshe ekenin atap ótti.

– Dańqty sportshy, Olımpıada chempıony Jaqsylyq Úshkempirov aǵamyz bastaǵan bul Jambyl óńiri kúres sheberlerine árdaıym baı ekenin dáleldep keledi. Jambyl jerinen shyqqan talaı sańlaq sportshylar el sportynyń tarıhyna óz esimderin altyn áriptermen jazyp qaldyrdy. Olardyń jeńisti joly búgingi jas býyn úshin úlken ónege ári maqtanysh. Atalǵan jetistikter óńirde sportty júıeli damytýǵa baǵyttalǵan eńbektiń, jattyqtyrýshylar men sportshylardyń tabandy izdenisiniń nátıjesi. Sizderge osy jarysta joǵary nátıjeler men ádil báseke tileımin, – dedi óńir basshysy.

Budan keıin sóz alǵan Qazaqstan kúres federaııasynyń prezıdenti Erkin Oqasov jas balýandarǵa sáttilik tilep, chempıonattyń elimizdegi kúres sportyn damytýdaǵy mańyzyna toqtaldy.

– El chempıonatynyń kıeli Taraz tórinde ótip jatqanyna shynaıy qýanyshtymyn. Sebebi, bul óńir – talaı álem jáne Olımpıada chempıondaryn tárbıelegen qasıetti meken. Sondyqtan, osy balýandardyń arasynan da  elimizdiń namysyn abyroımen qorǵaıtyn myqty chempıondardyń ósip shyǵatynyna kámil senimdimin. Bul chempıonat jastar úshin úlken jarystardyń alǵashqy baspaldaǵy. Iaǵnı búgingi jasóspirimder men jastar erteńgi Azııa jáne Álem chempıonattarynyń, sondaı-aq Olımpıada oıyndarynyń úmitteri, – dedi Erkin Qadyrǵalıuly.

Aıta ketsek, bıylǵy el chempıonatynda jas balýandarǵa aqshalaı syıaqylar qarastyrylǵan. U15 jas sanatynda chempıon 200 myń teńge, kúmis júldeger 100 myń teńge, al qola júldegerler 50 myń teńgeden alady. Al U23 sanatynda Qazaqstan chempıony 500 myń teńgege, ekinshi oryn ıegeri 300 myń teńgege, al úshinshi oryn alǵan balýandar 150 myń teńgeden syıaqyǵa ıe bolady. Sonymen qatar, chempıonatta arnaıy nomınaııalar da taǵaıyndalǵan. «Qaısar rýh» jáne «Dara tásil» atalymdarynyń jeńimpazdary 150 myń teńge kóleminde syıaqy alady.

Chempıonattyń alǵashqy jarys kúnderi grek-rım kúresiniń U15 jas sanatyndaǵy balýandar bozkilemge shyqty. Tartysty ótken beldesýlerdiń nátıjesinde Bereket Ismagýlov (38 kg, Mańǵystaý obl.), Raıymbek Jaqsylyq (41 kg, SQO), Nuraly Amangeldi (44 kg, Abaı obl.), Rollan Kım (48 kg, Almaty q.), Danıal Qanatbaı (52 kg, Almaty obl.), Aıtýǵan Osman (57 kg, Túrkistan obl.), Sanjar Týlepov (62 kg, Almaty q.), Rýslan Bákir (68 kg, Jambyl obl.), Nurtýǵan Murat (75 kg, Qaraǵandy obl.), Eralı Muratov (85 kg, Abaı obl.) jáne Nurmuhammed Talǵat (+85 kg, Abaı obl.) Qazaqstan chempıony atandy.

Al bul jas sanatyndaǵy jalpykomandalyq esepte qorjynynda 1 altyn, 2 kúmis jáne 4 qola medali bar Túrkistan oblysy 155 upaımen kósh bastady. Ekinshi jáne úshinshi oryndardy Jambyl oblysy (1 altyn, 1 kúmis, 3 qola) men Abaı oblysy (3 altyn) ıelendi. Olardyń enshisinde tıisinshe 106 jáne 89 upaı bar. Aıta ketsek, jalpykomandalyq esep United World Wrestling erejesi boıynsha ár salmaq dárejesindegi upaı sanymen sanalady.

P.S. Grek-rım, erkin jáne áıelder kúresinen U15 jáne U23 jas sanattary arasyndaǵy Qazaqstan chempıonaty 18 naýryzda óz máresine jetedi.