Jas balýandar álem chempıony atandy

Ázerbaıjannyń astanasy Baký qalasynda kúresten 17 jasqa deıingi sportshylar arasynda ótip jatqan álem chempıonatynda Qazaqstan quramasynyń balýandary Dııar Amanáli men Baqdáýlet Aǵabek altyn júldeni jeńip aldy.

Týrızm jáne sport mınıstrliginiń habarlaýynsha, erkin kúresten 48 kıloǵa deıingi salmaq dárejesinde Baqdáýlet Aǵabek fınalda Úndistannyń ókili Aarıan Aarıandy 10:0 esebimen  jeńip, álem chempıony atandy. Ol qarsylasyn tehnıkalyq basymdyqpen jeńdi.

Oǵan deıin Baqdáýlet Aǵabek bes beldesýdiń barlyǵynda jeńiske jetti.

Irikteý kezeńinde Tájikstan ókili Mýslıhıddın Hodjıevti (10:0), 8/1 fınalda Bolgarııa balýany Emır Djevatovty (10:0) ýaqytynan buryn jeńse, shırek fınalda Mońǵolııanyń ókili Temúúlen Ýsýhbaıardy nebári 36 sekýndta 10:0 esebimen aılasyn asyrdy. Al jartylaı fınalda 2026 jylǵy U17 Azııa chempıony, О́zbekstannyń ókili Farrýh Mahmýdovtan 7:3 esebimen basym tústi.

-28 shildede Qazaqstan quramasynda taǵy bir altyn medaldy grek-rım kúresinen 55 kelige deıingi salmaqta kúsh synasqan Dııar Amanáli jeńip aldy.

Ol chempıonattyń alǵashqy beldesýinde Grekııanyń ókili Nıkolaos Zınısısti 8:0, sodan keıin reseılik Edem Paızıevti 3:1 esebimen jeńdi. Shırek fınalda grýzııalyq Georgıı Kedelıdzden 2:1, jartylaı fınalda Bolgarııanyń ókili Danımır Iordanovtan 8:1 esebimen basym túsip, fınalǵa joldama aldy, — delingen mınıstrliktiń habarlamasynda.

Fınalda Dııar Amanáli Majarstannyń ókili Keve Kovachpen beldesti. Negizgi ýaqyt 1:1 esebimen aıaqtaldy. Bul beldesýde qazaq balýany birinshi bolyp nátıjeli ádis istedi. Sóıtip, ol UWW erejesine sáıkes, jeńiske jetti.
Osylaı Dııar Amanáli men Baqdáýlet Aǵabek Qazaqstan quramasyna 17 jasqa deıingi sportshylar arasyndaǵy álem chempıonatynyń eki altyn medalin jeńip alyp, qurmet tuǵyrynyń eń bıik satysyna kóterildi.