SportPress.kz قازاقستان سپورت جاڭالىقتارى
قازاقستاننىڭ ايەلدەر اراسىنداعى جەكەلەي سىنداعى ءبىرىنشى راكەتكاسى ەلەنا رىباكينا نيۋ-يوركتە 2026 جىلعى اقش اشىق چەمپيوناتىن جەڭىپ الدى.
ول US Open ءتۋرنيرىنىڭ فينالىندا بەلارۋس وكىلى ارينا سوبولەنكومەن ويناپ، 6:4، 5:7، 6:2 ەسەبىمەن جەڭىسكە جەتتى.
تەننيسشىلەر كورتتا 2 ساعات 23 مينۋت وينادى. وسى ۋاقىتتا رىباكينا 12 ەيس جاسادى. 12 برەيك-پوينتتىڭ ۇشەۋىن ساتتى پايدالاندى.
وسىلايشا، رىباكينا مانسابىندا العاش رەت US Open چەمپيونى اتانىپ، «ۇلكەن دۋلىعا» تۋرنيرلەرىندەگى ءۇشىنشى چەمپيوندىق اتاقتى جەڭىپ الدى. وسى ساناتتاعى العاشقى جۇلدەسىن وتانداسىمىز 2022 جىلى ۋيمبلدوندا جەڭىپ العان ەدى. بيىلعى جىلدىڭ باسىندا رىباكينا Australian Open چەمپيونى اتانسا، ەندى ءوز جۇلدەلەر توپتاماسىن اقش اشىق چەمپيوناتىنىڭ تيتۋلىمەن تولىقتىردى.
قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ ەلەنا رىباكينانى تاريحي جەتىستىگىمەن قۇتتىقتادى.
«بۇل — ەلەنانىڭ وراسان زور جەڭىسى ءارى قازاقستان تەننيسى ءۇشىن تاريحي كۇن. ەلەناعا تاعى دا بار كۇش-جىگەرىن سالىپ، الەمدەگى ەڭ ءىرى تەننيس ارەنالارىنىڭ بىرىندە ەڭ جوعارى دەڭگەيدەگى ويىن كورسەتكەنى ءۇشىن العىس ايتامىن.
ەلەنا ەلىمىزدەگى تەننيستىڭ تابىستى دامۋىن جارقىن تۇردە كورسەتىپ كەلەدى. ونىڭ الەمدىك تەننيستىڭ ەڭ بيىك شىڭىنا كوتەرىلۋى قازاقستاندىق جاس تەننيسشىلەر ءۇشىن ۇلكەن شابىت كوزى بولاتىنى ءسوزسىز. ءبىز ءوز تاراپىمىزدان ولاردى الداعى ۋاقىتتا دا جان-جاقتى قولداۋدى جالعاستىرامىز»، دەدى بولات وتەمۇراتوۆ.
US Open تۋرنيرىندەگى جەڭىس رىباكينانىڭ 2026 جىلعى ماۋسىمداعى تاعى ءبىر تاريحي جەتىستىگى بولدى. تۋرنير قورىتىندىسى بويىنشا تەننيسشى مانسابىندا العاش رەت WTA الەمدىك رەيتينگىنىڭ كوشىن باستايدى.
داستان كەنجالين،
استانا
