Jámıla Baqbergenova álem chempıonatynyń qola júldesi úshin kúresedi

Astana qalasynda kúres túrlerinen ótip jatqan álem chempıonatynda ekinshi jarys kúniniń jartylaı fınal beldesýleri bastaldy.

Jámıla Baqbergenova (-72 kg) Qytaı ókili Zelý Lımen fınalǵa beriler joldamany sarapqa saldy. Bul synda otandasymyz qarsylasynan 4:2 esebimen jeńildi.

Endi erteń ulttyq qurama sportshysy qola medal úshin baq synaıdy. Onyń qarsylasy jubanysh kezeńinen soń belgili bolady.

Búgin irikteýde Jámıla Baqbergenova Moldova ókili Emılııa Krechýndy, odan keıin shırek fınalda Ýkraına ókili Nadııa Sokolovskany aıqyn basymdyqpen jeńdi.

Jalpy, Baqbergenova osyǵan deıin eresekter arasynda -72 kg salmaqta úsh ret álem chempıonatynyń fınalynda beldesip, kúmis júldeger atanǵan (2021, 2022, 2024 j). Sonymen qatar 2023 jyly úshinshi orynnan kóringen.

Dastan KENJALIN,

ASTANA