فۋتبولدان ءاچ: ەۋروپا ەلدەرىندە جاپپاي تارتىپسىزدىك باستالدى

فۋتبولدان كاتاردا ءوتىپ جاتقان الەم چەمپيوناتىنىڭ جارتىلاي فينالىندا فرانتسيانىڭ ۇلتتىق قۇراماسى ماروككو كومانداسىن جەڭگەننەن كەيىن تولقۋ باستالدى. جاپپاي تارتىپسىزدىكتەر فرانتسيامەن قاتار، بەلگيادا دا بولىپ جاتىر.

فرانتسيا مەن ماروككو قۇرامالارىنىڭ ماتچى 2:0 ەسەبىمەن اياقتالعان ەدى. وسىنى سىلتاۋ ەتىپ، اشۋعا بۋلىققان حالىق پاريج بەن مونپولە قالالارىنىڭ كوشەلەرىنە شىعىپ، پوليتسياعا قولدارىنا تۇسكەن زاتتاردىڭ ءبارىن لاقتىرىپ، تارتىپسىزدىك جاسادى.

Daily Mail باسىلىمىنىڭ حابارلاۋىنشا، سارسەنبىدەن بەيسەنبىگە قاراعان ءتۇنى پاريجدە فرانتسيا مەن ماروككو قۇرامالارى جانكۇيەرلەرىنىڭ اراسىندا قاقتىعىس بولدى. كوشەگە شىققانداردىڭ كوبىسى – تەگى ماروككولىق ازاماتتار. فرانتسيادا بۇرىننان بەرى ماروككونىڭ ۇلكەن قاۋىمداستىعى تۇرادى. ولاردىڭ كوبىسىنىڭ قوس ازاماتتىعى بار. ويتكەنى، ماروككو – 1956 جىلعا دەيىن فرانتسيانىڭ وتارى بولعان ەل.

بۇل قاقتىعىسقا ءپاريجدىڭ پوليتسياسى وتكەن اپتادان بەرى دايىندالعان. سول كەزدە ءتارتىپ ساقشىلارى شيرەك فينالدا ماروككو كومانداسى پورتۋگاليا قۇراماسىن جەڭگەننەن كەيىن جانكۇيەرلەر اراسىندا بولعان توبەلەستى ۋاقىتىندا توقتاتقان بولاتىن. ال RMC Sport مالىمەتى بويىنشا، كەشەگى قاقتىعىستا مونپەلە قالاسىندا 14 جاستاعى ءجاسوسپىرىم قازا تاپقان. فرانتسيا جانكۇيەرلەرى وتىرعان كولىككە بەلگىسىز ادامدار كەلىپ، تەرەزەدەن شىعىپ تۇرعان ۇلتتىق كوماندانىڭ تۋىن ج ۇلىپ العان. جۇرگىزۋشى كەنەت ورنىنان قوزعالىپ، 14 جاستاعى بالانى قاعىپ كەتكەن. ول اۋرۋحانادا العان جاراقاتىنان كوز جۇمعان.

بۇعان دەيىن دە مۇندا فرانتسۋزدار مەن ەتنيكالىق ماروككولىقتار اراسىندا جاپپاي قاقتىعىس بولعان.

قولدا بار مالىمەتكە قاراعاندا، قازىر قاقتىعىس فرانتسيانىڭ پاريج، نيتستسا، مونپەلە قالاسى مەن بەلگيانىڭ استاناسى بريۋسسەلدە ۇلاسىپ كەتتى. پوليتسيا جانكۇيەرلەرگە كوزدەن جاس اعىزاتىن گاز قولدانسا، شەرۋشىلەر پوليتسيا قىزمەتكەرلەرىنە قارسى وتشاشۋلار اتىپ، باسقا دا زاتتاردى لاقتىرىپ، بىرنەشە قوقىس دوربالارى مەن كارتون جاشىكتەردى ورتەپ جىبەرگەن.

داستان كەنجالين،

استانا