الەم چەمپيوناتى تاريح قويناۋىنا كەتتى

الماتىدا جىلدام جانە بليتس شاحماتتان الەم چەمپيوناتىنىڭ جابىل سالتاناتى ءوتتى.  ءبىر اپتاعا سوزىلعان  الەمدىك دوداعا  تاڭداۋلى گروسسمەيستەرلەر قاتىسىپ، جارىس كورىگىن قىزدىردى.

الەم چەمپيوناتىنىڭ سالتاناتتى جابىلۋ راسىمىندە ءسوز سويلەگەن الماتى قالاسىنىڭ اكىمى ەربولات دوساەۆ  دودانىڭ ەلىمىزدە وتۋىنە مۇرىندىق بولعان حالىقارالىق شاحمات فەدەراتسياسىنا (FIDE) العىسىن ءبىلدىردى.  بۇعان دەيىن دە سپورت تۇرلەرىنەن الەم چەمپيوناتى، باسقا دا ماڭىزدى دودالار  ءوتىپ كەلە  جاتقان الماتى قالاسىنىڭ اكىمدىگى  شاحماتتان الەم چەمپيوناتىنا دا ۇلكەن قولداۋ كورسەتتى. قازاقستان شاحمات فەدەراتسياسىنىڭ ۆيتسە-پرەزيدەنتى دارمەن سادۋاقاسوۆ الماتى قالاسىنىڭ اكىمى ەربولات دوساەۆقا  جىلدام جانە بليتس شاحماتتان وتكەن الەم چەمپيوناتىنىڭ بەلگىسى سانالاتىن ەستەلىك تاقتانى سىيعا تارتىپ،  فەدەراتسيا ۇجىمى اتىنان العىس ايتتى.

بۇل الەم چەمپيوناتى دا تاريح قويناۋىنا كەتتى. الماتىدا وتكەن عالامدىق دودا قازاقستان شاحماتىنىڭ ورلەۋ ءداۋىرى تۋىپ كەلە جاتقانىن تاعى ءبىر مارتە پاش ەتتى.

جىلدام شاحماتتان ياعني راپيدتەن الەم چەمپيونى اتاعىن جانە كۋبوك پەن مەدالدى نورۆەگ سپورتشىسى، الەمدىك گروسسمەيستەر ماگنۋس كارلسەن ەنشىلەدى. ول 13 ۇپايدىڭ 10-جينادى.  كەيىنگى ون جىلدىڭ ىشىندە  شاحماتتان ماگنۋستى  جەڭەتىن  شاحماتشى شىقپاي تۇر. كۇمىس مەدال 13 ۇپايدان 9،5 ۇپايىن  العان    گەرمانيالىق  ۆينسەنت كايمەرگە بۇيىردى.  راپيدتەن  قولا مەدال  امەريكالىق فابيانو كارۋانانىڭ قانجىعاسىنا بوكتەرىلدى.

راپيدتەن قىزدار اراسىندا الەم چەمپيونى اتاعى قىتايلىق تان چجۋنيگە بۇيىردى. كۇمىس مەدال جەرلەسىمىز دينارا سادۋاقاسوۆاعا جازىلدى.  قولا مەدالدى ۇندىستاندىق  ساۆيتا شري الدى.

بليتستەن ەرلەر دوداسىندا دا الەم چەمپيونى اتاعى نورۆەگ ماگنۋس كارلسەننىڭ قانجىعاسىنا بوكتەرىلدى.  21 ۇپايدىڭ 16-سىن جيناعان كارلسەن ەلىنە وراسان ولجامەن اتتاندى. كۇمىس مەدال امەريكالىق حيكارۋ ناكامۋراعا  بۇيىردى. ول 15 ۇپاي الدى. قولا  جۇلدەنى ارمەنيانىڭ جاس شاحماتشىسى كەلەشەگىنەن ۇلكەن ءۇمىت كۇتەتىن تالانتتى ۇل  ايك مارتيروسيان  الدى. ول دا 21 ۇپايدىڭ 15-ءىن يەلەندى.

بليتستەن قىزدار اراسىنداعى دودادا  كۇللى قازاقستاندىقتار ءبيبىسارا اساۋباەۆانىڭ جولىنان جۇلدە كۇتتى. بىلتىر پولشادا وتكەن الەم چەمپيوناتىندا  بليتستەن التىن مەدال العان بولاتىن. ءبيبى قىزىمىز سول  بيىگىنەن تومەندەمەي ەلىمىزدە وتكەن الەم چەمپيوناتىندا ءانۇرانىمىزدى شىرقاتىپ، كوك تۋىمىزدى جەلبىرەتىپ الەم چەمپيونى اتاندى. كۇمىس مەدال شاحماتتىڭ وتانى سانالاتىن ءۇندىستاننىڭ قىزى  حامپي كونەرۋگە بۇيىردى. قولا جۇلدەنى رەسەيلىك پولينا شۋۆالوۆا ولجالادى.  حالىقارالىق شاحمات فەدەراتسياسىنىڭ (FIDE) باسشىلارى  قازاق ەلىنە  شاحماتتان الەم چەمپيوناتىن جوعارى دەڭگەيدە وتكىزگەنى ءۇشىن العىسىن ءبىلدىردى.

قۋانىش راحمەت،

الماتى