تۇلعانى ەسكە الۋ ءتۋرنيرى

«جاقسى ادام ەل ىرىسى، جاڭبىر جاۋسا جەر ىرىسى»، دەگەن ەكەن دانا حالقىمىز. قازاق سپورتىنىڭ دامۋىنا زور ۇلەسىن قوسقان تاۋ تۇلعالى ازاماتتار كوپ ەكەنىن بىلەمىز. سولاردىڭ ىشىندە باسشىلىق قىزمەتتە ءجۇرىپ، قولىنان كەلگەن جاقسىلىعىن قازاق سپورتىنىڭ وركەندەۋىنە، كەشەندى عيماراتتاردىڭ بوي كوتەرۋىنە سۇبەلى ۇلەسىن قوسقان ءىرى تۇلعانىڭ ءبىرى — كاركەن احمەت ۇلى احمەتوۆ دەپ ايتار ەدىك.

ول كىسىنىڭ قازاق كسر مينيسترلەر كەڭەسىندەگى سپورت كوميتەتىنىڭ توراعاسى بولىپ تۇرعان جىلدارى «التىن عاسىر» دەپ اتاۋ بەرگەن ەكەن. كاركەن احمەت ۇلىنىڭ تىكەلەي باسشىلىعىمەن الماتىدا ورتالىق ستاديون، «مەدەۋ» مۇز ايدىنىمەن قوسا كوپتەگەن سپورت عيمراتتارى سالىنعانىن بىرەۋ بىلسە بىرەۋ بىلمەس. سونىمەن قاتار، كاركەن احمەت ۇلى تۇسىندا سپورتشىلار سپورتتىڭ ءار تۇرىنەن كوپتەگەن ءىرى حالىقارىلىق جارىستاردا بايگەلى بولىپ، ەلىمىزدىڭ اتىن وداق تۇگىلى الەمگە تانىمال ەتتى.

بۇگىندە الماتىداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى  كەڭپەيىلدى كەمەل  باسشى، بىلگىر مامان، ارداقتى تۇلعا،قوعام قايراتكەرى  كاركەن احمەت ۇلى احمەتوۆتىڭ اتىمەن اتالادى. بۇل مەكتەپتەن اتى الەمگە تانىلعان سپورتشىلاردىڭ قاتارى قالىڭ. سولاردىڭ ءبىرى دە بىرەگەيى وليمپيا ويىندارىنىڭ كۇمىس جۇلدەگەرى ەلدوس سمەتوۆتى ايتساق جەتىپ جاتىر.

ايتۋلى مەكتەپ-ينتەرنات كوللەدجدىڭ قابىرعاسىندا ايگىلى تۇلعانىڭ ەسكە الۋعا ارنالىپ ۇيىمداستىرىلعان دودالى جارىستىڭ ماقساتى دا سول جاس ۇرپاققا، التىننىڭ سىنىعى كاركەن احمەتوۆتىڭ كىم بولعانىن ەسكە الا وتىرىپ جاس بۋىننىڭ سپورتقا، ەلگە دەگەن كوزقاراسىن جاقسارتا ءتۇسۋ بولعان ەكەن.

جۋىردا دزيۋدو اكادەمياسىندا مەملەكەت جانە قوعام قايراتكەرى، قازاق سپورتىنىڭ جاناشىرى كاركەن احمەت ۇلى احمەتوۆتى ەسكە الۋعا ارنالعان كادەتتەر اراسىندا رەسپۋبليكالىق تۋرنير بولىپ ءوتتى. بۇل جارىستى وتكىزۋگە مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى مۇرىندىق بولدى. تۋرنيرگە قۇرمەتتى قوناق رەتىندە: كاركەن احمەتوۆتىڭ تۇعان ۇلى نۇرلان كاركەن ۇلى مەن دزيۋدو كۇرەسىنەن كوپتەگەن سپورت ساڭلاقتارىن جاتتىقتىرعان قازاقستانعا ەڭبەك سىڭىرگەن جاتتىقتىرۋشىلار – جەكسەنباي سالاماتوۆ، سەيدوللا كاليەۆ، دۇيسەن ايازبەكوۆ پەن تولەگەن سۇلتانوۆ كەلىپ قاتىستى.

جارىسقا «شاڭىراق» شاعىن اۋدانىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىمەن وننان استام سپورت كلۋبىنان كەلگەن 100-دەن اسا تاتامي شەبەرلەرى 9 سالماق دارەجەسى بويىنشا ءوزارا مىقتىنى انىقتادى. كاركەن احمەتوۆ اتىنداعى سپورت مەكتەبىنىڭ جاس سپورتشىلارى بۇل جارىستا جاقسى ناتيجە كورسەتتى. ولار 6 سالماقتا 6 التىن، 1 كۇمىس جانە 3 قولا مەدالدى جەڭىپ الدى .
سونىمەن التىن جۇلدەنى گابيت راسۋلحان (46 كگ)، نۇراسىل پان (50 كگ)، التىنبەك كونىسباي (55 كگ)، مۇحامەتالى جىلقايدىر (60 كگ)، دياس يحسانوۆ (66 كگ) پەن باتىرحان توقتار (+73) جەڭىپ السا،  جالعىز كۇمىس مەدالدى  55 كگ سالماقتا ايدىن شۇكىربەك يەلەندى. ال جۇلدەلى قولا مەدالگە  مارحانبەت جانارىس (42 كگ)، قۇربان ورازاقىنوۆ (60 كگ) پەن نۇردوس دوسبەرگەن (60 كگ) يە بولدى.

جارىس سوڭىندا قادىرلى قوناقتارعا ەستەلىك سىيلىقتار تابىس ەتىلىپ، جەڭىمپازدار مەن جۇلدەگەرلەر ماراپاتتالدى. وسىنداي جارىستار دارىندى بالۋانداردىڭ شىڭدالىپ وسۋىنە زور ىقپال بەرەرى ءسوزسىز. الداعى ۋاقىتتا بۇل تۋرنير حالىقارالىق دەڭگەيگە كوتەرىلىپ جاتسا، نۇر ۇستىنە نۇر بولار دەپ ايتار ەدىك.

اقىن ورداباي ۇلى،

الماتى