SportPress.kz قازاقستان سپورت جاڭالىقتارى
ءۇندىستاننىڭ استاناسى – دەلي قالاسىندا ءوتىپ جاتقان ايەلدەر اراسىنداعى الەم چەمپيوناتىنىڭ جارتىلاي فينالىندا قازاقستان قۇراماسىنىڭ ەكى بوكسشىسى فينالعا جولداما الدى.
1/2 فينالدا قازاقستاننىڭ 6 بوكسشىسى شارشى الاڭعا شىقتى. ولاردىڭ ەكەۋى عانا جەڭىسكە جەتىپ، التىن مەدالعا تالاسۋعا مۇمكىندىك الدى.
اۋەلى 48 كيلوعا دەيىنگى سالماقتاعى الۋا بالقىبەكوۆا ۇندىستاندىق نيتۋ گانگاستان ۇپاي سانىمەن جەڭىلىپ قالدى. ودان كەيىن رينگكە 57 كيلوعا دەيىنگى سالماقتاعى كارينا يبراگيموۆا كوتەرىلىپ، الەمنىڭ ەكى دۇركىن، قۇرلىقتىڭ ءبىر مارتە چەمپيونى تايۆاندىق لين يۋيتينمەن كەزدەستى. بۇل جەكپە-جەكتە وتانداسىمىز قارسىلاسىنان باسىم ءتۇستى. وسىعان دەيىن قولا مەدالدان ارتىق جۇلدە الىپ كورمەگەن كارينانىڭ بۇل جەڭىسى شىنىندا دا سەنساتسيا رەتىندە باعالاندى.
كەلەسى كەزەكتە 66 كگ سالماقتاعى نادەجدا ريابەتس قىتايلىق يان ليۋدەن ايلاسىن اسىرا المادى. ول قولا جۇلدەنى قاناعات تۇتتى. سودان كەيىن ۆالەنتينا حالزوۆا اۆستراليالىق كەيتلين پاركەرمەن قولعاپ ءتۇيىستىرىپ، جەڭىلىستىڭ اششى ءدامىن تاتتى. 81 كگ سالماقتاعى فاريزا شولتاي دا قىتايلىق ۆان ليناعا قارسى ايقاستا ارتىقشىلىق كورسەتە العان جوق. وسىلايشا بۇل ەكەۋى كوماندا قورجىنىن تاعى ەكى قولا جۇلدەمەن تولىقتىردى.
فينالدىق جەكپە-جەكتە ونەر كورسەتۋ قۇقىعىن العان ەكىنشى سپورتشىمىز 81 كيلودان اۋىر سالماقتاعى ءلاززات كۇنگەيباەۆا بولىپ شىقتى. ول ازەربايجان اينۋر رزاەۆانى ۇتتى.
بۇگىن – فينال. بارلىق جەكپە-جەكتەر كەشكى سەسسيادا، ساعات 18:30-دا باستالادى. ترانسلياتسيا Qassport تەلەارناسىنان تىكەلەي ەفيردە كورسەتىلەدى.
داستان كەنجالين،
