شاحماتتان الەم قۇراماسى ازىرشە الدا كەلەدى

استانادا الەمدە تۇڭعىش رەت ءبىر ەلدىڭ شاحماتتان ايەلدەر كومانداسى الەم قۇراماسىنا قارسى ويىندى باستادى بۇعان دەيىن مۇنداي جارىس ءۇش رەت تەك ەرلەر قۇرامالارى اراسىندا وتكىزىلگەن بولاتىن.

بيىلعى ايەلدەر ماتچىندا قازاقستان مەن الەم قۇرامالارى ويىندارعا ەكى كوماندادان قاتىستىرىپ جاتىر. «ا» كوماندالارىنىڭ قۇرامىندا ءتورت ەرەسەك سپورتشى بار. ال «ۆ» كوماندالارى – 14، 16، 18 جانە 20 جاسقا دەيىنگى سپورتشىلار.

ماتچتىڭ جەرەبە تارتۋ ناتيجەسى بويىنشا، حوۋ يفان گروسسمەيستەر دينارا سادۋاقاسوۆاعا قارسى قارا فيگۋرالارمەن وينادى. ءۇندى شاحماتشىسى حاريكا دريۋناۆاللي مەرۋەرت كاماليدەنوۆاعا قارسى شىقتى. گروسسمەيستەر ءبيبىسارا اسساۋباەۆا ويىندى ازەربايجان وكىلى گۇناي مامەدزادەگە قارسى باستادى. گروسسمەيستەر جانسايا ابدىمالىك تە گرۋزين شاحماتشىسى نانا دزاگنيدزەگە قارسى قارا فيگۋرامەن وينادى.

جاسوسپىرىمدەر اراسىندا زارينا نۇرعاليەۆا وزبەكستاندىق افرۋزا حامداموۆاعا قارسى اق ءتۇستى، ال كسەنيا بالاباەۆا بولگاريالىق نۇرگۇل ساليموۆاعا قارسى قارا ءتۇستى فيگۋرالارمەن وينادى. ۆەنگريالىق جوكا گاال الۋا نۇرمانوۆاعا قارسى قارا ءتۇستى، ۇندىستاندىق شاحماتشى شري ب.ساۆيتا وتانداسىمىز ليا قۇرمانعاليەۆاعا قارسى ويىندى قارا ءتۇستى فيگۋرالارمەن باستادى.

ماتچتىڭ العاشقى كۇنى قىزدار راپيد بويىنشا 4 راۋند وينادى. كەزدەسۋدىڭ ءبىرىنشى كۇنى شەتەلدىك سپورتشىلاردىڭ باسىمدىعىمەن اياقتالدى. قازاقستان كومانداسى 13،5 ۇپاي، ال الەم قۇراماسى 18،5 ۇپاي جينادى. حوۋ يفان دينارا سادۋاقاسوۆا مەن جانسايا ابدىمالىكپەن تەڭ ءتۇسىپ، مەرۋەرت كاماليدەنوۆانى ۇتىپ، ءبيبىسارا اساۋباەۆادان ۇتىلدى.

بۇگىن شاحماتشىلار ءراپيدتىڭ تاعى 4 راۋندىن، ال 19 ساۋىردە سەگىز راۋندتىق بليتس وينايدى. سودان كەيىن جەڭىمپاز قۇراما بەلگىلى بولادى. ايەلدەر اراسىنداعى كوماندالىق ماتچتىڭ جالپى جۇلدە قورى — 50 000 دوللار.

داستان كەنجالين،

استانا