Shahmattan álem quramasy ázirshe alda keledi

Astanada álemde tuńǵysh ret bir eldiń shahmattan áıelder komandasy álem quramasyna qarsy oıyndy bastady Buǵan deıin mundaı jarys úsh ret tek erler quramalary arasynda ótkizilgen bolatyn.

Bıylǵy áıelder matchynda Qazaqstan men álem quramalary oıyndarǵa eki komandadan qatystyryp jatyr. «A» komandalarynyń quramynda tórt eresek sportshy bar. Al «V» komandalary – 14, 16, 18 jáne 20 jasqa deıingi sportshylar.

Matchtyń jerebe tartý nátıjesi boıynsha, Hoý Ifan grossmeıster Dınara Sádýaqasovaǵa qarsy qara fıgýralarmen oınady. Úndi shahmatshysy Harıka Drıýnavallı Merýert Kamalıdenovaǵa qarsy shyqty. Grossmeıster Bıbisara Assaýbaeva oıyndy Ázerbaıjan ókili Gúnaı Mamedzadege qarsy bastady. Grossmeıster Jansaıa Ábdimálik te grýzın shahmatshysy Nana Dzagnıdzege qarsy qara fıgýramen oınady.

Jasóspirimder arasynda Zarına Nurǵalıeva ózbekstandyq Afrýza Hamdamovaǵa qarsy aq tústi, al Ksenııa Balabaeva bolgarııalyq Nurgúl Salımovaǵa qarsy qara tústi fıgýralarmen oınady. Vengrııalyq Joka Gaal Alýa Nurmanovaǵa qarsy qara tústi, úndistandyq shahmatshy Shrı B.Savıta otandasymyz Lııa Qurmanǵalıevaǵa qarsy oıyndy qara tústi fıgýralarmen bastady.

Matchtyń alǵashqy kúni qyzdar rapıd boıynsha 4 raýnd oınady. Kezdesýdiń birinshi kúni sheteldik sportshylardyń basymdyǵymen aıaqtaldy. Qazaqstan komandasy 13,5 upaı, al álem quramasy 18,5 upaı jınady. Hoý Ifan Dınara Sádýaqasova men Jansaıa Ábdimálikpen teń túsip, Merýert Kamalıdenovany utyp, Bıbisara Asaýbaevadan utyldy.

Búgin shahmatshylar rapıdtiń taǵy 4 raýndyn, al 19 sáýirde segiz raýndtyq blı oınaıdy. Sodan keıin jeńimpaz qurama belgili bolady. Áıelder arasyndaǵy komandalyq matchtyń jalpy júlde qory — 50 000 dollar.

Dastan KENJALIN,

ASTANA