SportPress.kz قازاقستان سپورت جاڭالىقتارى
بۇگىن استاناداعى «ەگەمەن قازاقستان» گازەتىنىڭ كوشەسىندە جۋرناليستەر ساياباعى اشىلدى. ونىڭ اشىلۋ راسىمىنە اقپارات جانە قوعامدىق دامۋ ءمينيسترى دارحان قىدىرالى، استانا قالاسىنىڭ اكىمى جەڭىس قاسىمبەك، «قازاق گازەتتەرى» جشس باس ديرەكتورى ديحان قامزابەك ۇلى، بەلگىلى قالامگەرلەر ساۋىتبەك ابدراحمانوۆ، جانات ەلشىبەك، جانبولات اۋپباەۆ پەن باسقا دا جۋرناليستيكانىڭ ارداگەرلەرى مەن باق باسشىلارى قاتىستى.
سالتاناتتى ءىس-شارادا اقپارات جانە قوعامدىق دامۋ ءمينيسترى دارحان قىدىرالى ءسوز سويلەپ، جينالعان قاۋىمدى اللەيانىڭ اشىلۋمەن قۇتتىقتادى.
بۇگىن قازاق جۋرناليستيكاسى ءۇشىن تاريحي ءسات بولدى دەۋگە بولادى. ەلورداداعى «ەگەمەن قازاقستان» كوشەسىندە جۋرناليستەر ساياباعى اشىلدى. ارنايى ساياباقتىڭ اشىلۋىن ەلىمىزدە جۋرناليستەرگە كورسەتىلگەن قۇرمەتتىڭ ءبىر كورىنىسى دەپ باعالاۋعا بولادى. وسىدان ءدال ەكى جىل بۇرىن ءدال وسى ماڭدا مەملەكەت باسشىسىنىڭ قاتىسۋىمەن الاش قايراتكەرلەرىنىڭ ەسكەرتكىشى اشىلعانى بەلگىلى. سول قالامگەرلەر اللەياسىنا ۇلاسىپ جاتقان جۋرناليستەر ساياباعى ۇلتتىق رۋحانياتتىڭ ساباقتاستىعىن كورسەتەدى، – دەدى ول.
ودان كەيىن ول جۋرناليستەر ساياباعىنداعى ءساندى ستەللادا قازاق ۇلتتىق ءباسپاسوزىنىڭ باعدارى بولعان احمەت بايتۇرسىن ۇلى مەن تاۋەلسىز قازاق باسىلىمدارىنىڭ باسشىسى بولعان شەرحان مۇرتازا بەينەسىنىڭ قاتار ورنالاسۋى دا ۇلىلاردىڭ ۇلى جولىنىڭ ساباقتاستىعىن بىلدىرەتىنىن، سوندىقتان ەلدەگى بەلگىلى باسىلىمدار مەن اقپارات قۇرالدارىنىڭ اتى قاشاپ جازىلعان بۇل ەسكەرتكىشتى وتاندىق جۋرناليستيكانىڭ جىلناماسى دەپ باعالاۋعا بولاتىنىن ايتتى.
تاياۋدا عانا پرەزيدەنتتىڭ قامقورلىعىمەن 2 اقپان ۇلتتىق ءباسپاسوز كۇنى بولىپ بەلگىلەندى. بۇل دا قازاق باسپاسوزىنە كورسەتىلىپ وتىرعان ۇلكەن قولداۋ دەپ بىلەمىز، – دەدى مينيستر ودان ءارى.
ونىڭ ايتۋىنشا، جالپى ەلوردانىڭ وركەندەۋىنە جۋرناليستەر كوپ ەڭبەك ءسىڭىرىپ جاتىر. استانا الاتاۋدان ارقاعا اۋعاندا كوشتىڭ باسىندا شەرحان مۇرتازا جۇرگەن ەدى. سوندىقتان بۇل يگى ءىس-شارا استانانىڭ تۋعان كۇنى – 25 جىلدىق مەرەيتويىنا ارنالعان ۇلكەن تارتۋ.
وسى رەتتە ول «Egemen Qazaqstan» مەن «كازاحستانسكايا پراۆدا» گازەتتەرىنىڭ عيماراتىنىڭ الدىنداعى قاراۋسىز جاتقان جەردى ءساندى ساياباققا اينالدىرۋ يدەياسى وسىدان 4 جىل بۇرىن باس باسىلىمنىڭ عاسىرلىق بەلەسىندە كەلگەنىن، سونىڭ ءساتى بۇگىن ءتۇسىپ وتىرعانىن اتاپ ءوتتى.
«ەگەمەندىكتەرمەن» بىرگە بارشا ارىپتەستەرىمدى قۇتتىقتايمىن! بولاشاقتا بۇل ءساندى ساياباق بارشا ءجۋرناليستىڭ باسىن قوساتىن، شىعارماشىلىقتارىنا شابىت بەرەتىن، يگى ءىس-شارالار وتەتىن الاڭعا اينالادى دەپ سەنەمىن. وسى ىسكە قولداۋ كورسەتكەن قالا اكىمدىگىنە، جەڭىس ماحمۇد ۇلىنا العىس ايتامىن، – دەدى ول.
ودان ءارى استانا قالاسىنىڭ اكىم جەڭىس قاسىمبەك جۋرناليستەر ساياباعىنىڭ استانا كۇنى قارساڭىندا اشىلىپ جاتقانىن، ەلوردانىڭ 25 جىلدا تەك اكىمشىلىك ورتالىق ەمەس، سونىمەن بىرگە شىعارماشىلىق جانە رۋحاني ورداعا اينالعانىن ايتتى.
25 جىلدا استانا تەك اكىمشىلىك ورتالىق ەمەس، شىعارماشىلىق مادەني جانە رۋحاني ورتالىققا اينالدى. بۇگىندە ەلىمىزدىڭ ەڭ ءىرى باسىلىمدارىنىڭ بۇقارالىق اقپارات قۇرالدارىنىڭ وكىلدەرىنىڭ ورتالىق كەڭسەسى استانا قالاسىندا ورنالاسقانى زاڭدىق قۇبىلىس دەپ سانايمىز. سونداي-اق بۇل ساياباق «قالامگەرلەر اللەياسىمەن» ۇشتاسىپ جاتىر. ول جەردە قازاقتىڭ العاشقى گازەتتەرىن اشقان الاش ارىستارىنىڭ ەسكەرتكىشى تۇر، – دەدى قالا اكىمى جەڭىس قاسىمبەك.
«قازاق گازەتتەرى» جشس باس ديرەكتورى ديحان قامزابەك ۇلى الاش قايراتكەرلەرىنە ارناپ تۇعىرتاستاردىڭ كوتەرىلۋى بۇگىنگى «Egemen Qazaqstan» مەن «كازاحستانسكايا پراۆدا»، سونىڭ اينالاسىندا «قازاق گازەتتەرىنىڭ» قايتا جاڭعىرۋى بۇگىنگى ۋاقىتتىڭ تالابى بولىپ وتىرعانىن اتاپ كورسەتتى.
بۇگىنگى جۋرناليستەرگە دانالىق، باتىرلىق اۋاداي قاجەت. اعا بۋىن مەن بۇگىنگى جۋرناليستەردىڭ اراسىنداعى التىن كوپىر جالعاسىن تابا بەرەدى دەپ ويلايمىز. اشىلعان ساياباعىمىزدىڭ ابىرويى مەن بەدەلى ارتا بەرسىن. وسىندا كەلگەن جۋرناليستەر ساباق الاتىنداي، ۇلكەن شەبەرلىك مەكتەبى بولاتىنداي جاقسى جەتىستىكتەرگە جەتە بەرەيىك، – دەدى ديحان قامزابەك ۇلى.
بەلگىلى عالىم، قالامگەر، قوعام قايراتكەرى ساۋىتبەك ابدراحمانوۆ عاسىردان اسا تاريحى بار اتا باسىلىم تۋرالى ايتا كەلىپ، ەلىمىزدىڭ باس گازەتىنىڭ كوشەسىندە ورنالاسقان جۋرناليستەر ساياباعى بۇقارالىق اقپارات قۇرالدارى وكىلدەرى ءۇشىن ءمانى مەن ماڭىزى جاعىنان ەلەۋلى وقيعا بولاتىنىن، اللەيانىڭ قالا كۇنى قارساڭىندا اشىلۋى جۋرناليستەردىڭ جۇمىسى مەن قىزمەتىنە كورسەتىلگەن قۇرمەت ەكەنىن اتاپ ءوتتى.
اللەيانىڭ ورتاسىنا ستەللا قويىلعان. بۇل ستەللانىڭ ءبىر جاعىندا ۇلت ۇستازى احمەت بايتۇرسىن ۇلىنىڭ، ەكىنشى جاعىندا كەزىندە قازاق گازەتتەرى رەداكتورلارىنىڭ رەداكتورى اتانعان، قازاق ءباسپاسوزى مەن تەلەۆيزياسىنىڭ قايراتكەرى شەرحان مۇرتازانىڭ بەينەسى تۇر. سونداي-اق ستەللادا قازاق باسىلىمدارىنىڭ، تەلەارنالارى، سايتتارى مەن پورتالداردىڭ اتتارى قاشالىپ جازىلعان.
سونىمەن بىرگە اللەيادا قولىنا ميكروفون ۇستاعان جۋرناليست قىز بەن قاسىندا ونى كامەراعا ءتۇسىرىپ تۇرعان ەر ادامنىڭ ءمۇسىنى قويىلعان. ساياباق كوگالداندىرىلعان، اباتتاندىرىلعان. ونىڭ اعاشتارى، ورىندىقتارى مەن شامدارى كەلىستى ورنالاسقان.
داستان كەنجالين،
فوتو: ەرلان وماروۆ
استانا
View this post on Instagram
