Astanada Jýrnalıster saıabaǵy ashyldy (FOTO, VIDEO)

in Basty taqyryp, Qoǵam, Qurmet 04.07.2023 0 292 ret oqyldy

Búgin Astanadaǵy «Egemen Qazaqstan» gazetiniń kóshesinde Jýrnalıster saıabaǵy ashyldy. Onyń ashylý rásimine Aqparat jáne qoǵamdyq damý mınıstri Darhan Qydyráli, Astana qalasynyń ákimi Jeńis Qasymbek, «Qazaq gazetteri» JShS bas dırektory Dıhan Qamzabekuly, belgili qalamgerler Saýytbek Abdrahmanov, Janat Elshibek, Janbolat Aýpbaev pen basqa da jýrnalıstıkanyń ardagerleri men BAQ basshylary qatysty.

Saltanatty is-sharada Aqparat jáne qoǵamdyq damý mınıstri Darhan Qydyráli sóz sóılep, jınalǵan qaýymdy alleıanyń ashylýmen quttyqtady.

Búgin qazaq jýrnalıstıkasy úshin tarıhı sát boldy deýge bolady. Elordadaǵy «Egemen Qazaqstan» kóshesinde Jýrnalıster saıabaǵy ashyldy. Arnaıy saıabaqtyń ashylýyn elimizde jýrnalısterge kórsetilgen qurmettiń bir kórinisi dep baǵalaýǵa bolady. Osydan dál eki jyl buryn dál osy mańda memleket basshysynyń qatysýymen Alash qaıratkerleriniń eskertkishi ashylǵany belgili. Sol qalamgerler alleıasyna ulasyp jatqan Jýrnalıster saıabaǵy ulttyq rýhanııattyń sabaqtastyǵyn kórsetedi, – dedi ol.

Odan keıin ol Jýrnalıster saıabaǵyndaǵy sándi stellada Qazaq ulttyq baspasóziniń baǵdary bolǵan Ahmet Baıtursynuly men táýelsiz qazaq basylymdarynyń basshysy bolǵan Sherhan Murtaza beınesiniń qatar ornalasýy da ulylardyń uly jolynyń sabaqtastyǵyn bildiretinin, sondyqtan eldegi belgili basylymdar men aqparat quraldarynyń aty qashap jazylǵan bul eskertkishti otandyq jýrnalıstıkanyń jylnamasy dep baǵalaýǵa bolatynyn aıtty.

Taıaýda ǵana prezıdenttiń qamqorlyǵymen 2 aqpan Ulttyq baspasóz kúni bolyp belgilendi. Bul da qazaq baspasózine kórsetilip otyrǵan úlken qoldaý dep bilemiz, – dedi mınıstr odan ári.

Onyń aıtýynsha, jalpy elordanyń órkendeýine jýrnalıster kóp eńbek sińirip jatyr. Astana Alataýdan Arqaǵa aýǵanda kóshtiń basynda Sherhan Murtaza júrgen edi. Sondyqtan bul ıgi is-shara Astananyń týǵan kúni – 25 jyldyq mereıtoıyna arnalǵan úlken tartý.

Osy rette ol «Egemen Qazaqstan» men «Kazahstanskaıa pravda» gazetteriniń ǵımaratynyń aldyndaǵy qaraýsyz jatqan jerdi sándi saıabaqqa aınaldyrý ıdeıasy osydan 4 jyl buryn bas basylymnyń ǵasyrlyq belesinde kelgenin, sonyń sáti búgin túsip otyrǵanyn atap ótti.

«Egemendiktermen» birge barsha áriptesterimdi quttyqtaımyn! Bolashaqta bul sándi saıabaq barsha jýrnalıstiń basyn qosatyn, shyǵarmashylyqtaryna shabyt beretin, ıgi is-sharalar ótetin alańǵa aınalady dep senemin. Osy iske qoldaý kórsetken qala ákimdigine, Jeńis Mahmudulyna alǵys aıtamyn, – dedi ol.

Odan ári Astana qalasynyń ákim Jeńis Qasymbek Jýrnalıster saıabaǵynyń Astana kúni qarsańynda ashylyp jatqanyn, elordanyń 25 jylda tek ákimshilik ortalyq emes, sonymen birge shyǵarmashylyq jáne rýhanı ordaǵa aınalǵanyn aıtty.

25 jylda Astana tek ákimshilik ortalyq emes, shyǵarmashylyq mádenı jáne rýhanı ortalyqqa aınaldy. Búginde elimizdiń eń iri basylymdarynyń buqaralyq aqparat quraldarynyń ókilderiniń ortalyq keńsesi Astana qalasynda ornalasqany zańdyq qubylys dep sanaımyz. Sondaı-aq bul saıabaq «Qalamgerler alleıasymen» ushtasyp jatyr. Ol jerde qazaqtyń alǵashqy gazetterin ashqan Alash arystarynyń eskertkishi tur, – dedi qala ákimi Jeńis Qasymbek.

«Qazaq gazetteri» JShS bas dırektory Dıhan Qamzabekuly Alash qaıratkerlerine arnap tuǵyrtastardyń kóterilýi búgingi «Egemen Qazaqstan» men «Kazahstanskaıa pravda», sonyń aınalasynda «Qazaq gazetteriniń» qaıta jańǵyrýy búgingi ýaqyttyń talaby bolyp otyrǵanyn atap kórsetti.

Búgingi jýrnalısterge danalyq, batyrlyq aýadaı qajet. Aǵa býyn men búgingi jýrnalısterdiń arasyndaǵy altyn kópir jalǵasyn taba beredi dep oılaımyz. Ashylǵan saıabaǵymyzdyń abyroıy men bedeli arta bersin. Osynda kelgen jýrnalıster sabaq alatyndaı, úlken sheberlik mektebi bolatyndaı jaqsy jetistikterge jete bereıik, – dedi Dıhan Qamzabekuly.

Belgili ǵalym, qalamger, qoǵam qaıratkeri Saýytbek Abdrahmanov ǵasyrdan asa tarıhy bar ata basylym týraly aıta kelip, elimizdiń bas gazetiniń kóshesinde ornalasqan Jýrnalıster saıabaǵy buqaralyq aqparat quraldary ókilderi úshin máni men mańyzy jaǵynan eleýli oqıǵa bolatynyn, alleıanyń qala kúni qarsańynda ashylýy jýrnalısterdiń jumysy men qyzmetine kórsetilgen qurmet ekenin atap ótti.

Alleıanyń ortasyna stella qoıylǵan. Bul stellanyń bir jaǵynda ult ustazy Ahmet Baıtursynulynyń, ekinshi jaǵynda kezinde qazaq gazetteri redaktorlarynyń redaktory atanǵan, qazaq baspasózi men televızııasynyń qaıratkeri Sherhan Murtazanyń beınesi tur. Sondaı-aq stellada qazaq basylymdarynyń, telearnalary, saıttary men portaldardyń attary qashalyp jazylǵan.

Sonymen birge alleıada qolyna mıkrofon ustaǵan jýrnalıst qyz ben qasynda ony kameraǵa túsirip turǵan er adamnyń músini qoıylǵan. Saıabaq kógaldandyrylǵan, abattandyrylǵan. Onyń aǵashtary, oryndyqtary men shamdary kelisti ornalasqan.

Dastan KENJALIN,

FOTO: Erlan OMAROV

ASTANA