كۇرەستەن ءاچ: ريزابەك ايتمۇحان فينالعا شىقتى

سەربيانىڭ بەلگراد قالاسىندا ەرەسەكتەر اراسىندا كۇرەس تۇرلەرىنەن ءوتىپ جاتقان الەم چەمپيوناتىنىڭ ەكىنشى كۇنى ەل قورجىنىنا العاشقى جۇلدە ءتۇستى.

86 كگ سالماقتا سىنعا تۇسكەن ازامات داۋلەتبەكوۆ قولا جۇلدە ءۇشىن تالاستا باحرەين بالۋانىنان باسىم ءتۇسىپ، جۇلدەمەن قوسا پاريج وليمپياداسىنىڭ جولداماسىن الدى. ال 92 كگ سالماقتا كۇش سىناسقان ريزابەك ايتمۇحان بارلىق قارسىلاستارىن ۇتىپ، فينالعا شىقتى. جارتىلاي فينالدا ول وسى سالماقتاعى (92 كگ) كوشباسشىنىڭ ءبىرى گرۋزيالىق ميرياني مايسۋرازدەنى  8:1 ەسەبىمەن جەڭدى.

ريزابەك الەم چەمپيوناتىن ەكىنشى اينالىمنان باستاعان بولاتىن. ول اۋەلى ماجارستاندىق بالاش يۋحاشتى، سوسىن تۇركيالىق فەيزۋللا اقتۇرىكتى تازا ۇتتى. ەندى بۇگىن ول ازەربايجاننىڭ بالۋانى وسمان نۋرماگومەدوۆپەن بەلدەسەدى.

شيرەك جانە جارتىلاي فينالداعى قارسىلاسىم مىقتى بولدى. قازىر ولار الەمدىك رەيتينگتە مەنەن جوعارى تۇر. فەيزۋللا اقتۇرىكتەن وسىعان دەيىن ەكى رەت جەڭىلگەنمىن. بۇگىن ءساتىن سالىپ، ەسە قايتاردىم. وسى جەكپە-جەكتەن كەيىن بويىمدا سەنىمدىلىك پايدا بولدى. گرۋزيالىق بالۋاندى بارىنشا شارشاتۋعا تىرىسىپ، دەگەنىمە جەتتىم. ەندى فينالدا بارىمدى سالىپ، ەلىمىزگە التىن مەدال الىپ قايتۋعا بارىمدى سالامىن، — دەدى ريزابەك تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

ريزابەك ايتمۇحان – بيىل ەلىمىزدىڭ عانا ەمەس، الەمدىك كۇرەس ماماندارىنىڭ جوعارى باعاسىن العان بوزكىلەم شەبەرى. ول جىلدىڭ باسىندا الماتىدا وتكەن كۇرەستەن قازاقستاننىڭ VI سپارتاكياداسىندا چەمپيون اتاندى. وسىدان كەيىن كوكتەمدە استانادا وتكەن ەرەسەكتەر اراسىنداعى ازيا چەمپيوناتىندا كۇمىس جۇلدەگە يە بولدى. سونداي-اق، يوردانيانىڭ اممان قالاسىندا وتكەن جاستار اراسىنداعى الەم چەمپيوناتىندا ەكىنشى ورىن الدى.

قازاقستان بالۋاندارى 1991 جىلدان بەرى ەركىن كۇرەستەن وتكەن الەم چەمپيوناتىندا 16 رەت جۇلدەگە يە بولدى. ونىڭ بەسەۋى كۇمىس، قالعانى قولا مەدال. ريزابەك ايتمۇحانعا دەيىن دۇنيەجۇزى دوداسىنىڭ فينالىندا نۇرقوجا قايپانوۆ كۇرەسكەن (70 كگ، 2019 جىلى نۇر-سۇلتان قالاسى).

ايتا كەتەتىن ءبار نارسە، 92 كگ دەيىنگى سالماق وليمپيادا باعدارلاماسىنا كىرمەيدى.

بۇدان باسقا 57 كەلىدەگى مەيرامبەك قارتباي قولا جۇلدەگە تالاسادى. ازىرشە ونىڭ قارسىلاسى بەلگىسىز. 74 كەلىدەگى نۇرقوجا قايپانوۆ پەن 79 كەلىدەگى بولات ساقاەۆتار جۇبانىش بەلدەسۋىندە كۇش سىناسادى.

قازىر اقش قۇراماسىنىڭ بالۋاندارى 3 التىن، 1 قولا جۇلدەمەن جالپىكوماندالىق ەسەپتە توپ باستاپ تۇرسا، يران قۇراماسىندا 1 التىن، 2 كۇمىس مەدال بار. گرۋزيادا 1 كۇمىس، 1 قولا، رەسەيدە 1 كۇمىس مەدال. قازاقستان، تۇركيا، سان-مارينو، بولگاريا، قىرعىزستان جانە ارمەنيا بالۋاندارى ءبىر-ءبىر قولا جۇلدەنى يەلەنىپ وتىر.

بۇگىن ەركىن كۇرەس شەبەرلەرى 65، 97 كەلىدە بەلدەسۋلەرىن وتكىزسە، ايەلدەر كۇرەسىنەن 55، 59 كەلىدە ىرىكتەۋ كەزەڭى باستالادى.

شامكەن بايىربەك،

استانا

فوتو: تۋريزم جانە سپورت مينيسترلىگى سپورتتى دامىتۋ ديرەكتسياسى