شاحماتشى الاننا بەرىكقىزى مەن مارك سميرنوۆ الەم چەمپيونى اتاندى

بۇگىن يتاليانىڭ مونتەسيلۆانو قالاسىندا شاحماتتان كادەتتەر اراسىندا (U8-U12) الەم چەمپيوناتى مارەسىنە جەتتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

بيىلعى باسەكەدە دە قازاق شاحماتشىلارى ايرىقشا جەڭىسىمەن كوزگە ءتۇستى. اتاپ ايتار بولساق، 10 جاسقا دەيىنگى جاس ساناتىندا الاننا بەرىكقىزى الەم چەمپيونى اتاندى. ول 11 تۋردان كەيىن 9،5 بالل جينادى. بارلىعى بۇل ساناتتا الەمنىڭ ۇزدىك 100 شاحماتشىسى باق سىناستى.

ەسكە سالا كەتەيىك، الاننا بىلتىر گرەكيانىڭ رودوس قالاسىندا 9 جاسقا دەيىنگى ساناتتا كلاسسيكالىق شاحماتتان الەم چەمپيونى اتانعان. وسى جولى ول دۇنيەجۇزى باسەكەسىندە ەكى رەت التىن جۇلدەنى جەڭىپ الدى.

ۇلدار اراسىندا (U12) مارك سميرنوۆ ەڭ كوپ ۇپاي جيناپ، باس جۇلدەگە قول جەتكىزدى. ونىڭ ەنشىسىندە 11 تۋردان كەيىن 10 ۇپاي.

تاعى ءبىر وتانداسىمىز حانزادا امانجول 12 جاسقا دەيىنگى ساناتتا كۇمىس جۇلدەگەر اتاندى (قوسىمشا كورسەتكىش بويىنشا الەم چەمپيوناتىندا ەكىنشى ورىندى يەلەندى).  بۇل ساناتتا 93 شاحماتشى قاتىستى.

ايتا كەتەيىك، اپەنين تۇبەگىندەگى چەمپيوناتقا 77 ەلدەن 710 ويىنشى جينالدى.

جالپى، كوماندالىق ەسەپتە قازاقستان كومانداسى 2 التىن، 1 كۇمىس جۇلدەنىڭ ارقاسىندا 1-ورىن الدى. قىتاي شاحماتشىلارى ەكىنشى (2 التىن، 1 قولا) ساتىعا تۇراقتاسا، ۇزدىك ۇشتىكتى ءۇندىستان 1 التىن، 1 قولا مەدالمەن تۇيىندەدى.