Shahmatshy Alanna Berikqyzy men Mark Smırnov álem chempıony atandy

Búgin Italııanyń Montesılvano qalasynda shahmattan kadetter arasynda (U8-U12) álem chempıonaty máresine jetti, dep habarlady Týrızm jáne sport mınıstrligi Sportty damytý dırekııasynyń baspasóz qyzmeti.

Bıylǵy básekede de qazaq shahmatshylary aıryqsha jeńisimen kózge tústi. Atap aıtar bolsaq, 10 jasqa deıingi jas sanatynda Alanna Berikqyzy álem chempıony atandy. Ol 11 týrdan keıin 9,5 ball jınady. Barlyǵy bul sanatta álemniń úzdik 100 shahmatshysy baq synasty.

Eske sala keteıik, Alanna byltyr Grekııanyń Rodos qalasynda 9 jasqa deıingi sanatta klassıkalyq shahmattan álem chempıony atanǵan. Osy joly ol dúnıejúzi básekesinde eki ret altyn júldeni jeńip aldy.

Uldar arasynda (U12) Mark Smırnov eń kóp upaı jınap, bas júldege qol jetkizdi. Onyń enshisinde 11 týrdan keıin 10 upaı.

Taǵy bir otandasymyz Hanzada Amanjol 12 jasqa deıingi sanatta kúmis júldeger atandy (qosymsha kórsetkish boıynsha álem chempıonatynda ekinshi oryndy ıelendi).  Bul sanatta 93 shahmatshy qatysty.

Aıta keteıik, Apenın túbegindegi chempıonatqa 77 elden 710 oıynshy jınaldy.

Jalpy, komandalyq esepte Qazaqstan komandasy 2 altyn, 1 kúmis júldeniń arqasynda 1-oryn aldy. Qytaı shahmatshylary ekinshi (2 altyn, 1 qola) satyǵa turaqtasa, úzdik úshtikti Úndistan 1 altyn, 1 qola medalmen túıindedi.