كاراتەشى ەلنۇر داۋىلباي الەم چەمپيوناتىن جەڭىپ الدى

جاپونيانىڭ استاناسى – توكيو قالاسىندا وتكەن كيوكۋشينكاي كاراتەدەن الەم چەمپيوناتىندا وتانداسىمىز ەرنۇر داۋىلباي التىن مەدال جەڭىپ الدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ول 17 جاسىندا وسىنداي ماڭىزدى جەتىستىككە جەتىپ، تىنىمسىز ەڭبەكتىڭ ارقاسىندا كەزەكتى رەت قۇرمەت تۇعىرىنا كوتەرىلدى.

ەلنۇر داۋىلباي 2007 جىلى 10 قاراشادا استانا قالاسىندا دۇنيەگە كەلگەن. 2014 جىلى استانا قالاسىنداعى №66 مەكتەپكە بارعان. ال ءبىر جىلدان كەيىن «Astana English School» مەكتەبىنە اۋىسىپ، ۇزدىك وقۋشىلاردىڭ ءبىرى، ءارى قۇرداستارىنا ۇلگى بولدى.

ونىڭ كاراتەدەگى جولى 7 جاستان باستالادى. ول العاشقى قادامىن «استانا كاراتە» ورتالىعىندا جاتتىقتىرۋشى ارمان مۇحامەدراحىمنىڭ جەتەكشىلىگىمەن جاسادى. كەيىنگى جىلدارى ونىڭ دايىندىعىن قازاقستان كيوكۋشينكاي KWF فەدەراتسياسىنىڭ جاتتىقتىرۋشىسى دارحان راقىمجانوۆ قاداعالاپ، سپورتشىنى جاڭا دەڭگەيگە كوتەردى.

سپورتتاعى 10 جىلدىڭ وزىندە ەلنۇر داۋىلباي 32 التىن مەدال، 22 كۇمىس، 28 قولا جۇلدە مەن 26 كۋبوك جەڭىپ الدى. ول 16 جاستان اسقاندا كاراتەدەن سپورت شەبەرى اتاعىن الدى.

ەلنۇر داۋىلبايدىڭ جەتىستىگى:

2022 جىل – ازيا چەمپيونى.

2024 جىل – قازاقستان چەمپيونى.

2024 جىل – ەۋروپا چەمپيونى (65 كگ سالماق دارەجەسىندە). ول تۇركيادا وتكەن VII ەۋروپا چەمپيوناتىندا توپ جاردى.

2024 جىل – الەم چەمپيونى (توكيو).

جىل سايىن ەلنۇر داۋىلباي گەرمانيا، نيدەرلاند، رەسەي، تۇركيا جانە جاپونيا سياقتى ەلدەردە وتەتىن جارىستارعا قاتىسىپ، جارىسقا جاقسى دايىندىعىن كورسەتىپ كەلەدى. ول الەم چەمپيونى اتاعىن جەڭىپ الۋ ءۇشىن مىقتى ءتارتىپ، كۇندەلىكتى جاتتىعۋلار مەن وتباسىنىڭ قولداۋى بولۋ كەرەك دەيدى.