كاراتەدەن اچ: قازاقستان العاش رەت ءتورت التىن مەدال جەڭىپ الدى

وزبەكستاننىڭ استاناسى – تاشكەنت قالاسىندا ءوتىپ جاتقان كاراتەدەن ازيا چەمپيوناتىندا قازاقستان قورجىنىنا تاعى 3 التىن مەدال ءتۇستى، دەپ حابارلادى قر تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ەرەسەكتەر اراسىندا العاش رەت قۇرلىق چەمپيوناتىنا قاتىسىپ جاتقان دايانا دارەنسكايا 68 كگ دەيىنگى سالماقتىڭ فينالىندا جاپون سپورتشىسى كاما تسۋباسانى جەڭدى.

وسىدان كەيىن تاتاميگە شىققان الەم چەمپيوناتىنىڭ قولا جۇلدەگەرى نۇرقانات اجىقانوۆ (-75 كگ) يران ەلىنەن كەلگەن قارسىلاسىنا ەش مۇمكىندىك بەرگەن جوق. ال توكيو وليمپياداسىنىڭ قولا جۇلدەگەرى سوفيا بەرۋلتسەۆا (+68 كگ) تاعى ءبىر جاپون كاراتەشىسى سۋميرە سۋگيتادان ايلاسىن اسىردى.

سودان سوڭ  كۋميتە باعدارلاماسىندا جولامان بيعابىل توپ جاردى. وسىلايشا، ۇلتتىق قۇراما 4 التىن، 1 كۇمىس، 5 قولا مەدالمەن جالپى ەسەپتە 1-ورىن الدى. ەكىنشى ساتىدا جاپونيا (3 التىن، 5 كۇمىس، 4 قولا)، ۇزدىك ۇشتىكتى 3 التىنمەن ۆەتنام تۇيىندەدى.

كۇمىس مەدال: كۋميتەدەن قازاقستان ايەلدەر قۇراماسى.

قولا جۇلدە: ءمولدىر جاڭبىرباي (-50 كگ)، اسەل قاناي (-61 كگ)، دانيار يۋلداشەۆ (-84 كگ)، دياس ۇلبەك (+84 كگ)، كۋميتەدەن قازاقستان ەرلەر قۇراماسى.

قازاقستان وسىعان دەيىن جالپى ەسەپتە ءبىرىنشى رەت توپ جارعان. مالايزيادا 2023 جىلى كومانداعا 1-ورىن ءۇشىن 3 التىن جۇلدە جەتكىلىكتى بولعان.

بيىل سارى قۇرلىق چەمپيوناتىندا 29 مەملەكەتتىڭ تاۋداۋلى 421 سپورتشىسى جۇلدەگە تالاسىپ جاتىر.

جالپى تاشكەنت قالاسى وسىعان دەيىن كاراتەدەن سارى قۇرلىق چەمپيوناتىن 3 رەت قابىلداعان.

ءبىزدىڭ ۇلتتىق قۇرامانىڭ ناتيجەسى:

2022 جىل  2 التىن، 4 كۇمىس، 2 قولا مەدال (جالپى ەسەپتە 3-ورىن).

2019 جىل 1 التىن، 2 كۇمىس جۇلدە (5-ورىن).

2012 جىل 1 التىن 3 كۇمىس 2 قولا مەدال 4-ورىن).