تۇركىستان وبلىسىنىڭ اكىمى ازيا چەمپيوندارىنا قۇرمەت كورسەتتى

تۇركىستان وبلىسىنىڭ سپورتشىلارى وتكەن ايدا وتە جاقسى ونەر كورسەتتى. اتاپ ايتساق، شري-لانكانىڭ كولومبو قالاسىندا جاستار اراسىندا وتكەن ازيا چەمپيوناتىندا 8 التىن مەدالءدى جەڭىپ الدى، دەپ حابارلادى تۇركىستان وبلىسى اكىمىنىڭ ءباسپاسوز قىزمەتى.

مىسالى، ەسكەك ەسۋدەن قىتايدا وتكەن ازيا چەمپيوناتىندا ءۇش التىن جۇلدەنى يەلەندى. سونىمەن قاتار استانا قالاسىندا پارا دزيۋدودان ۇيىمداستىرىلعان الەم چەمپيوناتىندا ەكى سپورتشى التىننان القا تاعىندى. وبلىس اكىمى نۇرالحان كوشەروۆ قازاقستاننىڭ ءانۇرانىن شارىقتاتقان وسى سپورتشىلاردى قابىلداپ، قۇرمەت كورسەتتى.

سىزدەر حالىقارالىق دەڭگەيدە ەل نامىسىن لايىقتى قورعاپ، قازاقستاننىڭ كوك بايراعىن بيىكتە جەلبىرەتىپ، تۇركىستاننىڭ ابىرويىن كوتەردىڭىزدەر. وسى جەتىستىكتەرىڭىز – پرەزيدەنت تاپسىرماسىنىڭ ناقتى ورىندالىپ جاتقانىننىڭ ايقىن دالەلى. مەملەكەت باسشىسى قاسىم-جومارت كەمەل ۇلى توقاەۆ ءوز جولداۋىندا «سپورت – ۇلت دەنساۋلىعى مەن جاس ۇرپاقتىڭ بولاشاعىنا سالىنعان ينۆەستيتسيا. ءبىز جاس تالانتتاردى قولداۋعا جانە سپورت ينفراقۇرىلىمىن دامىتۋعا باسا ءمان بەرۋىمىز كەرەك» دەپ اتاپ وتكەن بولاتىن. وبلىستا وسى باعىتتا ءتيىستى جۇمىستار جۇرۋدە. جىل سايىن جاڭا سپورت نىساندارى سالىنىپ جاتىر. 2024 جىلى 73 سپورت نىسانىنىڭ قۇرىلىسى اياقتالىپ، پايدالانۋعا بەرىلدى. 2025 جىلى تاعى 51 نىساننىڭ قۇرىلىسىن اياقتاۋ جوسپارلانۋدا. ءبىز، وبلىس باسشىلىعى، سپورتشىلارعا جانە ولاردىڭ جاتتىقتىرۋشىلارىنا بارىنشا قولداۋ كورسەتىپ كەلەمىز جانە بۇل باعىتتاعى جۇمىستار جالعاسادى. الداعى جارىستاردا دا جەڭىستى جولدارىڭىز جالعاسا بەرسىن.  تۇركىستاننان ءالى تالاي چەمپيوندار شىعادى دەپ سەنەمىز! – دەگەن نۇرالحان كوشەروۆ سپورتشىلاردى ارنايى ماراپاتتاپ، قارجىلاي سىياقى تاپسىردى.

كەزدەسۋدە داڭقتى بوكس جاتتىقتىرۋشىسى مىرزاعالي ايتجانوۆ، بوكستان ازيا چەمپيونى شۇعىلا ءنالىباي مەن ەسكەك ەسۋدەن ازيا چەمپيونى ارتيوم تەرەششەنكو ءسوز سويلەپ، سپورت سالاسىنا قولداۋ كورسەتكەن وبلىس باسشىلىعىنا ريزاشىلىقتارىن ءبىلدىردى. الداعى بايراقتى جارىستاردا جەڭىستى جولدى جالعاستىرۋعا كۇش سالاتىندارىن جەتكىزدى.

تۇركىستان وبلىسىندا سپورت سالاسىن دامىتۋ باعىتىندا جۇيەلى جۇمىس اتقارىلۋدا. وڭىردە سپورت نىساندارىنىڭ سانى ارتۋدا. قازىر تۇركىستاندا حالىقارالىق تالاپقا ساي اتشابار مەن ەسكەك ەسۋ كانالىنىڭ قۇرىلىسى ءجۇرىپ جاتىر.