سپورتتىق گيمناستيكادان اچ: قازاقستان ەرلەر كومانداسى ءۇش التىن جۇلدە الدى

وڭتۇستىك كورەيانىڭ چەچحون قالاسىندا سپورتتىق گيمناستيكادان جاسوسپىرىمدەر مەن ەرلەر اراسىنداعى ازيا چەمپيوناتى اياقتالدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

قازاقستان كومانداسى ءۇش جارىس كۇنىندە جەتى جۇلدەگە يە بولدى. ونىڭ ۇشەۋى التىن، ەكەۋى كۇمىس، ەكەۋى قولا مەدال.

پاريج وليمپياداسىنىڭ كۇمىس جۇلدەگەرى ناريمان كۋربانوۆ تۇتقالى ات سناريادىنداعى جاتتىعۋدا ەشكىمگە دەس بەرمەي، چەمپيون اتاندى. ول فينالدا الەمدەگى ەڭ كۇردەلى كومبيناتسيانى ورىنداپ، 14.933 ۇپاي جينادى. سودان كەيىن جاسوسپىرىمدەر ساناتىندا رومان حەگاي ناريمان سەكىلدى ءدال وسى ديستسيپلينادا چەمپيون اتاعىن جەڭىپ الدى (فينالدا 13.800 بالل). ال نۇرتاڭ ىدىرىسوۆ قوس سىرىق ديستسيپليناسىندا ۇزدىك شىقتى. ول فينالدا 13.933 ۇپاي يەلەندى.

بۇل — پاريج وليمپياداسىنان كەيىنگى العاشقى ءىرى جارىس. سول سەبەپتى، العان جۇلدەنىڭ ورنى بولەك. جاسىراتىنى جوق، ءبىزدىڭ قۇرلىقتاعى گيمناستار الەمدىك دەڭگەيدە وتە مىقتى. مۇندا قارسىلاستارمەن سىنعا ءتۇسۋ — ەرەكشە اسەر بەرەدى،- دەدى ءۇش دۇركىن ازيا چەمپيونى اتانعان ناريمان سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

ەركىن جاتتىعۋدا الەم چەمپيوناتىنىڭ قولا جۇلدەگەرى ميلاد كاريمي چەچحوندا وسى سىندا كۇمىسپەن كۇپتەلدى. تاعى ءبىر ەكىنشى ورىن تۇتقالى ات سناريادىندا نۇرتاڭ ىدىرىسوۆتىڭ ەنشىسىندە (جاسوسپىرىمدەر ساناتى).

كوماندالىق كوپسايىستا قازاقستان ەرلەر جانە جاسوسپىرىمدەر قۇراماسى ءۇشىنشى ورىننان كورىندى.

بىلتىر وتكەن XI سارى قۇرلىق باسەكەسىندە ۇلتتىق قۇراما (جاسوسپىرىمدەر، ەرلەر، ايەلدەر) جالپى ەسەپتە قىتاي مەن فيليپپيننەن كەيىن ءۇشىنشى ورىن العان. تاشكەنت قالاسىندا گيمناستارىمىز 3 التىن، 4 كۇمىس، 2 قولا مەدال يەلەنگەن.

جالپى، چەچحون قالاسىنداعى جارىسقا 24 ەلدىڭ تاڭداۋلى سپورتشىلارى جينالدى. ەندى 12-15 ماۋسىم ارالىعىندا ايەلدەر ءوزارا جۇلدەگە تالاسادى.