تەننيسشى قىز-جىگىتتەر قازاقستان چەمپيونى اتاندى

استانا قالاسىندا تەننيستەن ەرەسەكتەر اراسىنداعى قازاقستان چەمپيوندارى مەن جارىستىڭ جۇلدەگەرلەرى انىقتالدى.

ايەلدەر اراسىندا وسى جارىستىڭ 1-راكەتكاسى جىبەك قۇلامباەۆا ەش تالاسسىز ەل چەمپيونى اتاعىن جەڭىپ الدى. ول فينالدا چەمپيوناتتىڭ ءۇشىنشى راكەتكاسى بولىپ تىركەلگەن ارۋجان ساعىندىقوۆانى 6:4، 7:6 (7:5) ەسەبىمەن جەڭدى.

ودان كەيىن قولا مەدالدى ىڭكار دۇيسەباي پولينا سلەپتسوۆانى 7:6 (7:5)، 7:5 ەسەبىمەن جەڭىپ، يەلەندى.

ەرلەر اراسىنداعى فينالدا 17 جاستاعى ءامىر ومارحانوۆ تەمىرتاۋ تەننيس مەكتەبىنىڭ وكىلى گريگوري لوماكينمەن ويناپ، ونى ءبىرىنشى سەتتە 6:1 ەسەبىمەن جەڭدى. وسى ارادا لوماكين ارقا جاراقاتىنىڭ مازالاپ جاتقانىن ايتىپ، جارىستى جالعاستىرا المادى.

وسىلايشا، ءامىر ومارحانوۆ العاش رەت ەرەسەكتەر اراسىنداعى قازاقستان چەمپيونى اتاندى. قولا جۇلدە يسلام ورىنباسارعا بۇيىردى. ونىڭ قارسىلاسى تيمۋر ماۋلەنوۆ دەنساۋلىعىنا بايلانىستى كورتقا شىقپادى.

داستان كەنجالين،

استانا