قازاق قىزى تۇڭعىش رەت سولتۇستىك بۇعازىنان ءجۇزىپ ءوتتى

باتىس قازاقستان وبلىسىنىڭ تۋماسى انەل سىتدىقوۆا ەلىمىزدەن يرلانديا مەن شوتلانديا اراسىنداعى سولتۇستىك بۇعازىن ءجۇزىپ وتكەن العاشقى ايەل اتاندى.

ول Instagram الەۋمەتتىك جەلىدەگى پاراقشاسىندا بۇعازدى 4 قىركۇيەكتە ساعات 36 مينۋت 19 سەكۋندتا ءجۇزىپ شىققانىن ايتتى.

وتانداسىمىز سولتۇستىك بۇعازىن ءجۇزىپ وتكەن 185 ادامنىڭ قاتارىنا ەندى.

ءتورت ادامنىڭ ءبارى دە مارەگە جەتتى. مەنىمەن بىرگە بولعان گەرمانيالىق، وليمپيادا چەمپيونى اندرەاس 8 ساعاتتا ءجۇزىپ ءوتىپ، رەكورد جاسادى. ال اۆستراليالىق برەندا 11 ساعاتتا مارە سىزىعىن كەستى. تاعى ءبىر اۋستراليالىق دجون 15 ساعاتتا جەتتى، — دەيدى ءا.سىتدىقوۆا. 

ونىڭ ايتۋىنشا، باپكەرى سەرگەي لەنيۆكين ماسكەۋدەن كەلگەن. ول تۇركيالىق دوسىمەن بىرگە قولداۋشى رەتىندە قايىقتا بولعان.

سولتۇستىك بۇعازى – سۋى سالقىن، اعىسى قاتتى، الەمدەگى ەڭ قيىن مارافوندىق قاشىقتىقتاردىڭ ءبىرى.

ترياتلوننان قازاقستاننىڭ تۇڭعىش تەمىر حانشايىمى، ءبىرىنشى ايرونمەن (Ironman) جانە ۋلترامەن (Ultraman) انەل سىتدىقوۆا 2019 جىلى قازاقستاندىقتاردان العاش رەت ايگىلى لا-مانش بۇعازىن (38 كم) گيدروكوستيۋمسىز ءجۇزىپ وتكەن. ودان كەيىن 2022 جىلى جازدا اقش-تا مانحەتتەن ارالى اينالاسىندا 20 كوپىردى اينالىپ، 48،5 كم قاشىقتىقتى باعىندىردى. سودان كەيىن لوس-اندجەلەستە الەمدەگى ەڭ ۇزاق مارافوندىق قاشىقتىقتاردىڭ ءبىرى – كاتالينا بۇعازىن (34 شاقىرىمعا جۋىق) توقتاماستان ءجۇزىپ ءوتتى.