Tuńǵysh ret qazaq boksshysy asa aýyr salmaqta álem chempıony atandy

Bokstan Qazaqstan erler quramasynyń kapıtany Aıbek Oralbaı Ulybrıtanııanyń Lıverpýl qalasynda ótken álem chempıonatynda tuńǵysh ret qazaq bylǵary qolǵap sheberleriniń arasynda altyn medaldi jeńip aldy.

Bylǵary qolǵap sheberi 90 keliden asa salmaqta О́zbekstannyń ókili Jahongır Zokırovpen qolǵap túıistirdi.

Birinshi jáne ekinshi raýndta ózbek boksshysy basym tústi. Degenmen Aıbek Oralbaı sońǵy úshinshi raýndta qaısarlyq tanytyp, jeńisti sýyryp aldy.

Osylaısha, Qazaqstan quramasy álem chempıonatynda jeti altyn medaldi ıelendi. Alýa Balqybekova (51 kelige deıin), Sanjar Táshkenbaı (50 kelige deıin), Mahmud Sabyrhan (55 kelige deıin), Aıda Ábikeeva (65 kelige deıin), Natalıa Bogdanova (70 kelige deıin), Tórehan Sabyrhan (70 kelige deıin) men asa aýyr salmaqta Aıbek Oralbaı álem chempıony atandy.

Osy jerde aıtatyn bir nárse, Aıbek Oralbaı álem chempıonatynda tuńǵysh ret qazaq bylǵary qolǵap sheberleriniń arasynda altyn medaldi jeńip alsa, aǵaıyndy Mahmud pen Tórehan Sabyrhandar bir úıden, bir kúni shyqqan álem chempıondary boldy. Sonymen birge Mahmud Sabyrhan men Sanjar Táshkenbaı eki dúrkin álem chempıony atandy.

Nazym Qyzaıbaı (48 kelige deıin) kúmis júldeger boldy. Vıktorııa Grafeeva (60 kelige deıin) men Eldana Tálipova (80 keliden asa salmaq) qola júldeni qanaǵat tutty.

Rústem JUMAN,

ASTANA