الماتىدا شاحماتتان كادەتتەر اراسىنداعى الەم چەمپيوناتى باستالدى

الەم چەمپيوناتى 19–30 قىركۇيەك ارالىعىندا بولادى. وعان 8 بەن 12 جاس ارالىعىنداعى جاس شاحماتشىلار قاتىسادى، دەپ حابارلادى تۋريزم جانە سپورت مينيسترلىگى. 

چەمپيوناتقا قازىردىڭ وزىندە 88 ەلدەن 850-دەن استام جاس شاحماتشى تىركەلدى. ولاردىڭ قاتارىندا ءۇندىستاننان (28)، قىتايدان (25)، اقش-تان (24) قاتىسۋشىلار بار. قازاقستان چەمپيونات يەسى رەتىندە 200-دەن استام ويىنشىنى قاتىستىرادى.

الەمدىك دودا تۋريزم جانە سپورت مينيسترلىگى، الماتى قالاسىنىڭ اكىمدىگى، حالىقارالىق شاحمات فەدەراتسياسى (FIDE) مەن قازاقستان شاحمات فەدەراتسياسىنىڭ (KazChess) ۇيىمداستىرۋىمەن جالاۋ كوتەرەدى.

بۇگىن ونىڭ اشىلۋ سالتاناتىنا پرەمەر-ءمينيستردىڭ ورىنباسارى ەرمەك كوشەرباەۆ، الماتى قالاسىنىڭ اكىمى دارحان ساتىبالدى، فيدە پرەزيدەنتى اركادي دۆوركوۆيچ پەن KazChess پرەزيدەنتى تيمۋر تۋرلوۆ قاتىستى.

بۇعان دەيىن ەلىمىزدە شاحماتتان كوتپەگەن حالىقارالىق جارىستار، سونىڭ ىشىندە الەم چەمپيوناتتارى مەن ەرلەر اراسىنداعى الەم چەمپيونى اتاعى ءۇشىن ماتچ وتكىزىلدى.

بىلتىر يتاليانىڭ مونتەسيلۆانو قالاسىندا وتكەن الەم چەمپيوناتىنا 77 ەلدەن 700-دەن استام جاس شاحماتشى قاتىستى. بيىلعى چەمپيوناتتا قاتىسۋشىلار سانى ارتىپ، 88 ەلدەن 851 ويىنشى، سونىڭ ىشىندە 231 قازاقستاندىق تىركەلدى.

اشىلۋ راسىمىنەن كەيىن بىردەن 1-تۋر باستالدى. جالپى 19–30 قىركۇيەك ارالىعىندا شۆەيتسار جۇيەسى بويىنشا 11 تۋر بولادى. ۋاقىتتى باقىلاۋ – 90+30 فورماتى ء(ار پارتياعا 90 مينۋت جانە العاشقى جۇرىستەن باستاپ ءار قادامعا 30 سەكۋند قوسىلادى).

11 تۋردىڭ قورىتىندىسى بويىنشا الەم چەمپيوندارى، كۇمىس جانە قولا جۇلدەگەرلەر انىقتالادى. جارىس ۇلدار (Open) مەن قىزدار (Girls) اراسىندا التى جاس ساناتىندا بولىپ جاتىر. جاس ساناتتارى مىناداي: O8، G8، O10، G10، O12 جانە G12.

25 قىركۇيەك – دەمالىس كۇنى. بۇل كۇنى جاس سپورتشىلار ءۇشىن ارنايى مادەني-سپورتتىق باعدارلاما ۇيىمداستىرىلادى. ولار شىمبۇلاق تاۋ-شاڭعى كۋرورتىنا ەكسكۋرسياعا شىعادى (وندا حالىقارالىق شاحمات كۇنى – 20 شىلدەدە اشىلعان Minecraft ستيلىندەگى شاحمات اتىنىڭ ارت-وبەكتىسى بار)، سونداي-اق شەشىم شىعارۋ بويىنشا الەم چەمپيوناتىنا جانە جۇلدە قورى 2000 اقش دوللارى بولاتىن بليتس-تۋرنيرگە قاتىسا الادى.

چەمپيونات اياسىندا 27–28 قىركۇيەكتە Satbayev University-دە (الماتى، ساتپاەۆ كوشەسى، 22) «ءبىلىم بەرۋدەگى شاحمات» اتتى III حالىقارالىق كونفەرەنتسيا بولادى. وعان FIDE-ءنىڭ Chess in education كوميسسياسىنىڭ توراعاسى، اقش وكىلى دجەرري نەش قاتىسادى.