بۇگىن قارت قۇرلىقتا ۇلتتىق قۇرامالار الاڭعا شىعادى

بۇگىن ەۋروپانىڭ بىرنەشە قالاسىندا فۋتبولدان 2026 جىلعى الەم چەمپيوناتى ىرىكتەۋ تۋرنيرىنە قاتىسىن جاتقان ۇلتتىق قۇراما كوماندالار الاڭعا شىعادى.  

ماتچتار ءتورت توپتاعى قۇرامالار اراسىندا بولادى. C توبىندا شوتلانديا مەن گرەكيا، بەلارۋس پەن دانيا وينايدى. قازىر دانيا مەن شوتلانديا تۋرنير كەستەسىندە ەكى تۋردان كەيىن 4 ۇپايمەن ءبىرىنشى جانە ەكىنشى ورىندا كەلە جاتسا، گرەكيا ءۇش ۇپاي الدى. ال بەلارۋس قۇراماسىندا ازىرشە ۇپاي جوق.

G توبىندا مالتا مەن نيدەرلاند، فينليانديا مەن ليتۆا الاڭعا شىعادى. نيدەرلاند ءتورت ويىندا 10 ۇپاي الىپ وتىر. پولشادا بەس تۋردان كەيىن 10، فينليانديا 7، ليتۆا 3، مالتا 2 ۇپاي  بار.

H توبىندا اۋستريا مەن سان-مارينو، كيپر مەن بوسنيا مەن گەرتسوگوۆينا كەزدەسەدى. اۋستريا ءتورت تۋردان كەيىن 12 ۇپايمەن ءبىرىنشى ورىنعا جايعاسسا، بوسنيا جانە گەرتسوگوۆينا بەس ويىننان 12، رۋمىنيا 7، كيپر 4 ۇپاي الدى. ال سان-مارينو بارلىعىنا ەسە جىبەرىپ، ۇپاي العان جوق.

L توبىندا فارەر ارالدارى مەن چەرنوگوريا، چەحيا مەن حورۆاتيا وينايدى. حورۆاتيا تۋرنير كەستەسىندە ءتورت تۋردان كەيىن 12، چەحيا بەس ويىننان 12، فارەر ارالدارى مەن چەرنوگوريا 6 ۇپاي السا، گيبرالتار بىردە-ءبىر ۇپايعا يە بولعان جوق.

قازاقستان ۇلتتىق قۇراماسى ەرتەڭ 10 قازاندا 19:00-دە ليحتەنشتەين كومانداسىمەن وينايدى. ماتچ Qazsport تەلەارناسىنان تىكەلەي ەفيردە كورسەتىلەدى.

باس تورەشى مىندەتىن پاۆەل راچكوۆسكي اتقارسا، وعان مارتسين بونەك پەن بارتوش حەينيگ كومەكتەسەدى. ءتورتىنشى تورەشى دە سول ەلدىڭ وكىلى پاتريك گريتسكەۆيچ.

قازىر ۇلتتىق قۇراما بەلگيا (0:6)، ۋەلس (1:3، 0:1) پەن سولتۇستىك ماكەدونيا (0:1) قۇرامالارىنان جەڭىلىپ، ليحتەنشتەيننەن (2:0) باسىم ءتۇستى.

وسىدان كەيىن 13 قازاندا قازاقستان قۇراماسى سىرت الاڭدا سولتۇستىك ماكەدونيامەن وينايدى.

فۋتبولدان 21 جاسقا دەيىنگى قازاقستان جاستار قۇراماسى 2027 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا اندوررا كومانداسىمەن ويناپ، 0:1 ەسەبىمەن جەڭىلىپ قالدى.

ەندى ولار 12 جانە 14 قازان كۇندەرى تاشكەنت قالاسىندا وزبەكستان جاستار قۇراماسىمەن ەكى جولاستىق ماتچ وينايدى.

قازىر جاستار قۇراماسى D توبىندا سىنعا ءتۇسىپ جاتىر. ولار ءوز الاڭىندا اندوررانى (1:0) جەڭسە، انگلياعا (0:2) ەسە جىبەردى.

وسىدان كەيىن 13 قاراشادا سىرت الاڭدا سلوۆاكيامەن، 17 قاراشادا ءوز الاڭىندا مولدوۆامەن وينايدى.