استانادا جاس بالۋاندار باق سىنادى

استاناداعى Qazaqstan جەڭىل اتلەتيكالىق مانەجدە گرەك-ريم، ەركىن جانە ايەلدەر كۇرەسىنەن U17 جانە U20 جاس اراسىنداعى قازاقستان چەمپيوناتى مارەسىنە جەتتى، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

ون كۇنگە سوزىلعان دوداعا ەلىمىزدىڭ بارلىق وڭىرىنەن 1 200-دەن استام جاس سپورتشى قاتىسىپ، بوزكىلەمدە ءوز شەبەرلىگىن سىنادى.

ەل كۇرەسىنىڭ تاريحىندا تۇڭعىش رەت بيىلعى چەمپيوناتتا جۇلدەگەرلەرگە سىياقىلار تاعايىندالدى. كۇرەس تۇرلەرىنەن وتكىزىلەتىن قازاقستان چەمپيوناتتارىندا قارجىلاي جۇلدە قورى بۇرىن-سوڭدى قاراستىرىلماعان ەدى. بيىل بۇل سوما 60 ميلليون تەڭگە بولدى. اتاپ ايتقاندا، U17 ساناتىندا چەمپيون 300 مىڭ تەڭگە يەلەنسە، كۇمىس پەن قولا مەدال يەگەرلەرى تيىسىنشە 200 جانە 100 مىڭ تەڭگەدەن الدى. ال U20 ساناتىنىڭ چەمپيونىنا 500 مىڭ تەڭگە، ەكىنشى ورىنعا 300 مىڭ، ءۇشىنشى ورىنعا 150 مىڭ تەڭگە تابىس ەتىلدى. بۇل شەشىم جاس سپورتشىلارمەن قاتار، وڭىرلەردەگى باپكەرلەر مەن سپورت مەكتەپتەرى ءۇشىن دە ماڭىزدى قولداۋ بولدى.

قازاقستان كۇرەس فەدەراتسياسىنىڭ باس حاتشىسى دامير بەكبوسىنوۆتىڭ ايتۋىنشا، بيىلعى قارجىلاي ىنتالاندىرۋ تەك U17 جانە U20 ساناتتارىمەن شەكتەلمەيدى. فەدەراتسيا جاس ەرەكشەلىكتەرىنە قاراي بولاتىن بارلىق نەگىزگى قازاقستان چەمپيوناتتارىنىڭ جۇلدەگەرلەرىن جۇيەلى تۇردە قولداۋدى قولعا العان.

– قازاقستان كۇرەس فەدەراتسياسىنىڭ پرەزيدەنتى ەركىن قادىرعالي وقاسوۆتىڭ قولداۋىمەن بيىلعى قازاقستان چەمپيوناتتارىنا جالپى قۇنى 200 ميلليون تەڭگە بولاتىن قوماقتى جۇلدە قورى قاراستىرىلىپ وتىر.

مىسالى، U15 جاس ساناتىنىڭ چەمپيونىنا 200 مىڭ تەڭگە، U17 ساناتىندا 300 مىڭ، U20 مەن U23 ساناتتارىندا 500 مىڭ تەڭگە، ال ەرەسەكتەر اراسىنداعى قازاقستان چەمپيوندارىنا 1 ميلليون تەڭگە بەرىلەدى. بۇل – سپورتشىلار مەن جاتتىقتىرۋشىلار ءۇشىن ناقتى قولداۋ. وسىنداي قولداۋدىڭ ارقاسىندا چەمپيوناتتارىمىزدىڭ دەڭگەيى دە ارتا تۇسەدى دەپ سەنەمىن، – دەدى دامير اسەنعازى ۇلى.

جارىس قورىتىندىسى وڭىرلىك كۇرەس مەكتەپتەرىنىڭ دەڭگەيىن دە ايقىن كورسەتتى. گرەك-ريم كۇرەسىنەن U17 ساناتىندا جالپىكوماندالىق ەسەپتە الماتى وبلىسى 130 ۇپايمەن كوش باستادى. اباي وبلىسى 105 ۇپايمەن ەكىنشى ورىنعا تۇراقتاسا، شىمكەنت قالاسى 93 ۇپايمەن ۇزدىك ۇشتىكتى تۇيىندەدى. U20 ساناتىندا دا الماتى وبلىسىنىڭ بالۋاندارى 131 ۇپايمەن ءبىرىنشى ورىننان كورىندى. شىمكەنت قالاسى 115 ۇپايمەن ەكىنشى، اقتوبە وبلىسى 104 ۇپايمەن ءۇشىنشى ورىنعا يە بولدى.

ايەلدەر كۇرەسىندە U17 ساناتىندا الماتى قالاسىنىڭ قۇراماسى 137 ۇپايمەن العا شىقتى. تۇركىستان وبلىسى 108 ۇپايمەن ەكىنشى، جەتىسۋ وبلىسى 94 ۇپايمەن ءۇشىنشى ورىنعا جايعاستى. U20 ساناتىندا الماتى قالاسىنىڭ سپورتشىلارى 177 ۇپايمەن توپ باستادى. تۇركىستان وبلىسى 144 ۇپايمەن ەكىنشى، الماتى وبلىسى 113 ۇپايمەن ءۇشىنشى ساتىعا كوتەرىلدى.

ال ەركىن كۇرەستەن U17 ساناتىندا شىمكەنت قالاسى 128 ۇپايمەن جالپىكوماندالىق ەسەپتە ءبىرىنشى ورىنعا شىقتى. اباي وبلىسى 119 ۇپايمەن ەكىنشى بولسا، الماتى قالاسى 118 ۇپايمەن ءۇشىنشى ورىندى يەلەندى. ۇپاي ايىرماسىنىڭ از بولۋى وڭىرلەر اراسىنداعى باسەكەنىڭ تارتىستى وتكەنىن كورسەتتى. U20 ساناتىندا الماتى قالاسى 177 ۇپايمەن كوش باستاسا، تۇركىستان 130، ال الماتى وبلىسى 108 ۇپايعا يە بولدى.

سونىمەن قاتار، چەمپيوناتتا سپورتشىلاردىڭ كۇرەس كەزىندە كورسەتكەن قايسار مىنەز بەن شەبەرلىك تە فەدەراتسيا تاراپىنان ارنايى باعالاندى. ماسەلەن، «قايسار رۋح» اتالىمى بوزكىلەمدە تاباندىلىق تانىتىپ، سوڭىنا دەيىن بەرىسپەگەن بالۋاندارعا تاپسىرىلدى. بۇل جۇلدەنى ەركىن كۇرەستەن سىنعا تۇسكەن ايبەك قالياحمەت (79 كەلى، الماتى وبلىسى)، ايەلدەر كۇرەسىندە چەمپيون اتانعان دينارا داۋىلقىزى (53 كەلى، استانا قالاسى) جانە گرەك-ريم كۇرەسىندە توپ جارعان ديار ءامانالى (55 كەلى، شىمكەنت قالاسى) يەلەندى.

«دارا ءتاسىل» اتالىمى جوعارى تەحنيكالىق شەبەرلىگىمەن كوزگە تۇسكەن سپورتشىلارعا بەرىلدى. ەركىن كۇرەس وكىلى ادىلەت ماناپ (79 كەلى، الماتى وبلىسى)، گرەك-ريم كۇرەسىنىڭ بالۋانى ەركەبۇلان ءاناپيا (82 كەلى، الماتى وبلىسى) جانە ايەلدەر كۇرەسىنىڭ بۇرىمدى بالۋانى نازىم مۇرات (65 كەلى، اباي وبلىسى) اتالمىش نوميناتسيانىڭ يەگەرلەرى اتاندى.

سونداي-اق، چەمپيوناتتىڭ ءادىل وتۋىنە ۇلەس قوسقان تورەشىلەر دە ماراپاتتالدى. ايەلدەر كۇرەسىنەن كسەنيا دروبينا، گرەك-ريم كۇرەسىنەن الەكساندر گرۋدين جانە ەركىن كۇرەستەن تالعات مىرزابەك ۇزدىك تورەشى رەتىندە ارنايى سىياقىعا يە بولدى.

قورىتا ايتقاندا، ون كۇنگە سوزىلعان چەمپيونات مەدال يەلەرىن عانا ەمەس، بولاشاقتىڭ بەت-بەينەسىن دە ايقىندادى. بوزكىلەمگە شىققان جاس بالۋانداردىڭ تەحنيكالىق شەبەرلىگى مەن قايسار مىنەزى ولاردىڭ باسەكەلى  دودالارعا دايىن ەكەنىن اڭعارتتى. بۇگىنگى ەل چەمپيوندارى ەرتەڭ حالىقارالىق ارەنادا ەل نامىسىن ابىرويمەن قورعايتىن جاڭا بۋىن.