كونكيمەن جۇگىرۋ: قازاقستان سپرينتتە جەڭىسكە جەتتى

گەرمانيانىڭ ينتسەلل قالاسىندا كونكيمەن جۇگىرۋدەن ءوتىپ جاتقان جاسوسپىرىمدەر اراسىنداعى الەم چەمپيوناتىندا قازاقستان قورجىنى تاعى ءبىر التىن مەدالمەن تولىقتى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ۆارۆارا گلۋحوۆا، اناستاسيا بەلوۆودوۆا مەن كريستينا شۋمەكوۆادان قۇرالعان ايەلدەر كومانداسى كوماندالىق سپرينتتە 1:28.77 ۋاقىت كورسەتىپ، الەم چەمپيونى اتاندى.

ەكىنشى ورىندى پولشا قۇراماسى يەلەنسە، ءۇشىنشى ساتىعا كانادا سپورتشىلارى كوتەرىلدى.

وسىلايشا، قازاقستان قۇراماسىنىڭ جاسوسپىرىمدەر اراسىنداعى الەم چەمپيوناتىنداعى مەدال سانى التاۋعا جەتتى. بۇعان دەيىن كريستينا شۋمەكوۆا 500، 1000 جانە 1500 مەتر قاشىقتىقتارىندا، سونداي-اق كوپسايىستا التىن مەدال جەڭىپ العان بولاتىن. سونىمەن قاتار، ول 3000 مەتردە كۇمىس جۇلدەگە يە بولدى.

بۇگىن وتانداستارىمىز تاعى ءبىر مەدال ءۇشىن باق سىنايدى. اناستاسيا بەلوۆودوۆا، كريستينا شۋمەكوۆا، ميحايل ماتريۋحين جانە رۋسلان ءجاڭادىلوۆ ارالاس ەستافەتادا ەل نامىسىن قورعايدى.