II تۇركى ۋنيۆەرسياداسى: قازاقستان قورجىنىندا ازىرشە بەس التىن جۇلدە بار

وسى كۇندەرى قىرعىز رەسپۋبليكاسىنىڭ چولپون-اتا قالاسىندا جوعارى وقۋ ورىندارىنىڭ ستۋدەنتتەرى اراسىندا III تۇركى ۋنيۆەرسياداسى بولىپ جاتىر.

ۋنيۆەرسيادا 3 قىركۇيەكتە باستالدى. ول 9 قىركۇيەكتە اياقتالادى.  وعان تۇركى مەملەكەتتەرى ۇيىمىنا مۇشە ەلدەردىڭ (قازاقستان رەسپۋبليكاسى، ازەربايجان رەسپۋبليكاسى، قىرعىز رەسپۋبليكاسى، تۇركيا رەسپۋبليكاسى، وزبەكستان رەسپۋبليكاسى) ستۋدەنت-سپورتشىلارى قاتىسۋدا. جارىس ۆولەيبول، فۋتزال، ۇستەل تەننيسى، شاحمات، دزيۋدو، ەركىن كۇرەس جانە گرەك-ريم كۇرەسى سياقتى 7 سپورت ءتۇرى بويىنشا ءوتىپ جاتىر.

قازاقستان اتىنان  ۋنيۆەرسياداعا 15 جوعارى وقۋ ورنىنان 66 سپورتشى باردى. ولار سپورتتىڭ 7 ءتۇرى بويىنشا كۇش سىناسۋدا.

جالپى، II تۇركى ۋنيۆەرسياداسى دا وسى 7 سپورت ءتۇرى بويىنشا 2023 جىلعى 5-10 قاراشا ارالىعىندا تۇركىستان قالاسىندا وتكىزىلگەن. سول كەزدە وعان تۇركى مەملەكەتتەرى ۇيىمىنا مۇشە 5 ەلدەن 445 دەلەگات قاتىستى.

بيىلعى جارىستا قازاقستان ستۋدەنتتەرى ازىرشە 5 التىن، 1 كۇمىس جانە 1 قولا مەدال يەلەندى. ءىىى تۇركى ۋنيۆەرسياداسىندا العاشقى التىن جۇلدەنى حالەل دوسمۇحامەدوۆ اتىنداعى اتىراۋ ۋنيۆەرسيتەتىنىڭ ستۋدەنتى دانيار قۇلۋشەۆ 60 كگ دەيىنگى سالماق دارەجەسىندە جەڭىپ الدى.

بايشەۆ ۋنيۆەرسيتەتىنىڭ ستۋدەنتى گۇلنۇر باحانوۆا قازاقستان قۇراماسىنىڭ قورجىنىنا ەكىنشى التىن مەدالدى سالدى. ودان كەيىن دزيۋدودان م.ح.دۋلاتي اتىنداعى تاراز ۋنيۆەرسيتەتىنىڭ ستۋدەنتى ادىلەت احمەتعالي، ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى مۇحامەدالى ماۆليدوۆ مەن دەنە شىنىقتىرۋ جانە بۇقارالىق سپورت اكادەمياسىنىڭ ستۋدەنتى جاسۇلان حالحاباەۆ ۋنيۆەرسيادا چەمپيونى اتاعىن الدى.

الماتى گۋمانيتارلىق-ەكونوميكالىق ۋنيۆەرسيتەتىنىڭ ستۋدەنتى ىڭكار تۋلەپبەرگەنوۆا كۇمىس مەدال يەگەرى اتاندى. سونداي-اق قازاق سپورت جانە تۋريزم اكادەمياسىنىڭ ستۋدەنتى نۇرشات كەمەلحانقىزى قولا جۇلدەگە يە بولدى.

داستان كەنجالين،

استانا