سايىپقىران: ءۇش جارىستا – ءۇش قولا جۇلدە!

ساداق اتۋدان وڭتۇستىك كورەيانىڭ كۆاندجۋ قالاسىندا ءوتىپ جاتقان الەم چەمپيوناتىندا ەل قورجىنىنا العاشقى مەدال ءتۇستى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

كومپاۋند، قۇرالمالى ساداق باعدارلاماسى بويىنشا ادەل جەكسەنبينوۆا، ۆيكتوريا ليان، روكسانا يۋنۋسوۆا باستاعان كوماندامىز قولا جۇلدە ءۇشىن تالاستا ۇلىبريتانيانى 232:228 ەسەبىمەن جەڭدى.

وسىعان دەيىن ەل تاريحىندا 1993 جىلى كلاسسيكالىق ساداق اتۋدان ايەلدەر سايىسىندا يانا تۋنيانتس قولا جۇلدەگەر اتانعان.

ەركىنبەك بايتورەەۆ ءۇشىنشى ورىندى يەلەندى

اۆستريانىڭ زالتسبۋرگ قالاسىندا ا سەرياسىنداعى جارىس بولىپ جاتىر.

قازاقستان قۇراماسى قورجىنىنا العاشقى جۇلدەنى كۋميتە باعدارلاماسىندا 67 كگ دەيىنگى سالماقتا ەركىنبەك بايتورەەۆ سالدى. ول ءۇشىنشى ورىن ءۇشىن جەكپە-جەكتە كيپر سپورتشىسى لويزيدەس ءپانايوتيستى جەڭدى.

ۇلتتىق قۇراما سپورتشىسى توپتىق كەزەڭدە دجەد تومپسوندى (انگليا)، رۋفيني سامۋەلەنى (يتاليا)، ديەگو نۋنەس ريبەيرونى (پورتۋگاليا)، الەكساندر گۋيراندى (فرانتسيا) جەڭدى.

سودان كەيىن شيرەك فينالدا دزيۋدا دومينيكتەن (پولشا) باسىم ءتۇسىپ، جارتىلاي فينالدا گۋسەين مامەدليگە (ازەربايجان) 7:8 ەسەبىمەن جەڭىلدى.

ەركىنبەك بايتورەەۆ بيىل كوكتەمدە اقتاۋ قالاسىندا وتكەن ەرەسەكتەر اراسىنداعى قازاقستان چەمپيوناتىندا توپ جارعان.

بۇگىن زالتسبۋرگتە سوڭعى جارىس كۇنى بولادى. ۇلتتىق قۇراما ساپىندا كاتا جانە كۋميتە باعدارلاماسىندا بارلىعى 18 سپورتشى اتتاندى.

دانيل ۆاسيلەۆ FIS كۋبوگىندا مەدال الدى

بۇگىن دانيل ۆاسيلەۆ شاڭعىمەن تۇعىردان سەكىرۋدەن سلوۆەنيانىڭ ليۋبنو-وب-ساۆيني ەلدى مەكەنىندە وتكەن FIS كۋبوگىندا ءۇشىنشى ورىن الدى.

ۇلتتىق قۇراما كوشباسشىسى 250،7 ۇپاي جيناپ، قولا جۇلدەگەر اتاندى. بۇگىنگى ناتيجە (ترامپلين ك-90):

1. ادام نيجنيك (پولشا) – 268،3 بالل
2. ەنەي فالەتيچ (سلوۆەنيا) — 266،1
3. دانيل ۆاسيلەۆ — 250،7

دانيل ۆاسيلەۆ كەشە جارىستى ۇزدىك بەستىكتە اياقتاعان (275.0 ۇپاي). ال بىرنەشە اپتا بۇرىن پولشانىڭ ۆيسلا قالاسىنداعى جازعى الەم كۋبوگىندا ەكىنشى ورىن الىپ، تاريحي ناتيجە تىركەگەن.

بارلىعى سلوۆەنياداعى باسەكەدە 20-عا جۋىق ەلدەن 72 شاڭعىشى ءوزارا سىنعا ءتۇستى.